NGU-ELROY Gelant (11), ozimisele ngokugila izimanga Boxer Super Run 5km.

Mzwamandla Zondi

BABEKELWE isiteki sika-R147 200 abasubathi abazokwenza kahle kwiBoxer Super Run 5km ezokuba ngeSonto elizayo lomhla ka-12 ku-October eThekwini.

Lo mjaho ohlelwa yiBoxer Athletics Club (AC) ngokubambisana nabakwaStillwatersports, uphethe umklomelo ka-R20 000, ozotholwa yizingqwele ngokwehlukana kobulili.

Kukhokhelwa nabangena isibili kuya kwisihlanu kubo bobubili ubulili, kanjalo nabaphuma phambili ezigabeni ezahlukene, kusuka kumajuniya kuya kwizaguga (+70).

Kuza lo mjaho nje, umsubathi weBoxer AC, u-Elroy Gelant usanda kutshela abezindaba ukuthi ufuna ukwenza isikhathi esingaphansi kwemizuzu ewu-14 kulo mjaho obalwa nethandwayo ekhalendeni lezokugijima KwaZulu-Natal njengoba sishesha ukutholakala isibalo sabasubathi abasuke besidinga.

"Inhloso yami enkulu wukwenza isikhathi esingaphansi kwemizuzu ewu-14 kulo mjaho, ukufaka ingcindezi kozakwethu esizokube siyibambe nabo.

"Umklomelo ka-R20 000 otholwa yizingqwele kulo mjaho, muhle kakhulu ebangeni eliwu-5km.

"Ziningi izinto umsubathi onqobile asuke engazenza ngale mali. Angakwazi ukwakha umuzi, noma athenge izinto zokugijima.

"Lo mklomelo ungayishintsha kakhulu impilo yomgijimi uma ezokwazi ukuphatha kahle imali.

"Okuhle wukuthi umzila waseThekwini muhle futhi uqondile, uzosiza thina esingama-elite (abaziphilisa ngokugijima) ukuba senze izikhathi ezinhle kulo mjaho," kusho uGelant obemele izwe kwiWorld Athletics Championships eJapan.

 UGelant ungene endaweni yesihlanu kulo mjaho weBoxer 5km nyakenye.

KUBHEKWE ukuba uKarabo Mailula (295) abange ukushisa kwabesifazane kulo mjaho.

Kwabesifazane kubhekwe ngabomvu uKarabo More naye ogijimela iBoxer AC ukuba asivikele  isicoco sakhe.

Abanye abasubathi abangase baphendule amatafula kulo mjaho nguKarabo Mailula, nguGladwin Mzazi, noBennet Seloyi ukubala nje abambalwa.