Ezifingqiwe

NGUMENGAMELI uCyril Ramaphosa.

UMENGAMELI uCyril Ramaphosa ufanise ukwehluleka kwezifundazwe nomasipala ukusebenzisa ibhajethi abayabelwe, njengokuketula umbuso waseNingizimu Afrika.

Ephendula imibuzo kwiNational Council of Provinces (NCOP), ePhalamende, uRamaphosa uzwakalise ukukhathazeka ngesimo esesijwayelekile seminyango yezifundazwe nomasipala, sokwehluleka wukusabalalisa inkece ngendlela efanele kwizidingongqangi ezimqoka ezithinta izindlu nemigwaqo.

URamaphosa ukhale ngokuthi ukungayisebenzisi kahle ibhajethi kuhambisana nokungahleleki, ikakhulukazi ngasohlangothini lweziphathimandla.

NGUMNU Jacob Zuma.

UMENGAMELI woMkhonto weSizwe, uMnu Jacob Zuma, usebabele enkantolo ngesinqumo se-ANC sokunqamula ubulungu bakhe beminyaka ewu-65, eyilungu lokuqina layo.

Lokhu kuvezwe nguMnu Nhlamulo Ndhlela okhulumela iMK Party, othe bayameseka uZuma ngokuba nobulungu bamaqembu amabili njengoba esazimisele ngokuqhubeka nokuba yilungu le-ANC, futhi ehola iMK Party.

Kuzokhumbuleka ukuthi ikomidi lokuqondisa ubugwegwe kwi-ANC, lanquma ukunqamula ubulungu bukaZuma ngoJuly nyakenye.

Ekuqaleni kwalo nyaka, uZuma wabhalela leli komidi ngenhloso yokubuyiswa kobulungu bakhe, wabe esexwayisa ngokuthi uzobabela enkantolo uma isicelo sakhe singathathelwa phezulu.

NGUMNU Andrew Whitfield.

LIGCWALE umoya ibhantshi kuMnu Andrew Whitfield obeyisekela likangqongqoshe wezohwebo nezimboni kuzwelonke ngethikithi leDA.

Ukuhoxiswa kukaWhitfield kulesi sikhundla kumenyezelwe yiHhovisi likaMengammeli izolo ngoLwesine.

Imibiko iveza ukuthi uWhitfield uqhathwe wukuphulwa komgomo ayewubekelwe wokuba angabi yingxenye yethimba le-DA, elaliya eMelika.

USihlalo weSigungu esiPhezulu seDA, uNkk Helen Zille, bazoba nomhlangano ophuthu-mayo wokudingida lolu daba, okuyilapho okuzophuma khona isinqumo sesinyathelo abazosithatha njengoba lawa maqembu ekuhulumeni wokubusa ngokubambisana.

NGUDKT Zweli Mkhize.

LIKHIPHE isexwayiso esinzima iphalamende kwabazosebenzisa usizi lwezisulu ezingaphezu kuka-6 000 zase-Eastern Cape (EC), ezikhahlanyezwe yizikhukhula, ukuzicebisa.

Lesi sixwayiso sikhishwe yikomidi lasephalamende elibheke ukusebenza koMnyango wokuBusa ngokuBambisana nezoMdabu.
Ujwayelekile umkhuba wokudliwa kwemali esuke ikhishwe ukuba iyolekelela izisulu zezinhlekelele.

Usihlalo waleli komidi, uDkt Zweli Mkhize, uthi uyazi ukuthi abantu base-Eastern Cape abakhahlanyezwe yilezi zikhukhula, babheke usizo kuhulumeni.

Uthi ukholwa wukuthi akekho umuntu okumele azuze ngosizi lwabantu, kodwa kumele kusizakale izisulu.
Uveze ukuthi bazokwenza isiqiniseko sokuthi bathathelwa izinyathelo ezinqala abazama ukuzicebisa ngoxhaso okufanele luye emphakathini.

Kwenzeka lokhu nje, iSA Weather Services ikhiphe isixwayiso sesimo sezulu esingesihle ezingxenyeni eziningi zezwe, okubalwa kuzo nayo i-Eastern Cape, kule mpelasonto.