Mfanafuthi Ndlovu

INESILONDA esibhibhayo iMamelodi Sundowns esazikhotha amanxeba ngokuwashiswa ijezi ekuseni kwiClub Fifa World Cup eqhubeka e-United States of America (USA).

ISundowns iphume kusahlungwa uvucu nje kwiClub World Cup, beyiye kulo mqhudelwano ngethemba lokuzithoba izinhliziyo ngokuguqiswa yiPyramids FC yaseGibhithe kowamanqamu weCaf Champions League.

Nokho kakuyanga ngokwezifiso zayo njengoba iphinde yaphoxeka nakwiClub World Cup, ibuya ekuseni.

NGU-STEVE Komphela ongumsizi womqeqeshi weDowns.

ISITHOMBE NGABE: BACKPAGEPIX

Izindaba zobuhlungu obuzwiwa yile kilabhu zivezwe nguSteve "Mphathi" Komphela ongumsizi kaMiguel Cardoso, ongumlolongi wamaSandawana.

"Kuningi esikufundile kulo mqhudelwano esiphuma kuwona, nakwiChampions League. Ukudliwa kowamanqamu kwiChampions League kakuzange kwehle kahle.

"Nokho sikhona isipiliyoni esisizuzile ngokuba yingxenye yale midlalo. Kube buhlungu kakhulu ukuphuma ekuseni kwiClub World Cup, kufane nokuhlikihlwa kukasawoti esilondeni.

"Okuhle, kube wukuthi sikwazile ukugudlana ngamahlombe namakilabhu ahlonishwayo emhlabeni, okukhona kuwona iBorussia Dortmund yaseGermany (eguqise iDowns ngo-4-3), neFluminense FC yaseBrazil (ebambane nayo ngo-0-0)," esho.

IDowns igcine ilale isithathu kwiGroup F, kwadlula iDortmund neFluminense. Ubunzima baleli qoqo bucaciswa nawukuthi iDortmund neFluminense basekhona kuma-quarter final alo mqhudelwano.

"Ngangibatshelile abadlali ngaphambi kokuqala kwalo mqhudelwano ukuthi kuzokube kukhona izinhloli ezifana no-Arsene Wenger, obehlaziyela iFifa nezinga lebhola.

"Ngathi kufanele baziveze kulezi zinhloli. Ngikholwa wukuthi bakwenze konke, namanje baningi abasamangele ngezinga leSundowns emuva kwebhola elidlale khona," esho.