Ezemidlalo | 22
Friday, 23 May 2025
IDowns ibuhlelele ubunzima bowamanqamu weCaf
Seyike yayiguqisa iPyramids phambilini kulo mqhudelwano
NGU-AUBREY Modiba weSundowns (okwesobunxele) nozakwabo, uMothobi Mvala.
ISITHOMBE NGABE: BACKPAPEPIX
Senzo Sokhela
UDALULA ubungozi bezimbangi abazobhekana nazo kowamanqamu weCaf Champions League u-Aubrey Modiba odlala emuva kwiMamelodi Sundowns.
IDowns izogadulisana nePyramids yase-Egypt emlenzeni wokuqala kowamanqamu weCaf Champions League ngoMgqibelo ngo-15h00 eLoftus Stadium, ePitoli.
Lo mdlalo ubhekwe ngabomvu ngabathandi bebhola kwazise la makilabhu afuna ukuqopha umlando ngawo.
IDowns ifuna ukuba yikilabhu yokuqala eNingizimu Afrika ukuwunqoba kabili - njengoba yawunqoba ngo-2016 - kanti iPyramids yona ifuna ukuwunqoba okokuqala ngqa njengoba isanda kusungulwa.
Kuzokhumbuleka ukuthi le kilabhu ithengwe yisiqumama saseSaudi Arabia, uTurki Al Sheik (43) ngo-2019 isabizwa nge-Al Assiouty Sport, sabe sesiyizinzisa eCairo.
Siyishintshe igama. Kusukela ithengwe yilesi sikhulu, ibalwa namakilabhu amakhulu e-Afrika nase-Egypt.
UModiba uthe: "Silindele umdlalo onzima kwiPyramids. Silubonile uhambo lwayo obelubheke kowamanqamu ukuthi iyingozi. Kuzofanele siyiqaphele ikakhulukazi uma ihlasela ngoba ithuba elincane elitholayo kayilibheki.
"Abadlali bayo bayingozi emabholeni agotshiwe nakuma-free kick, kufanele sibagadisise ngalapho.
"Behluke kakhulu kunangesikhathi sibhekene nabo, bayiqembu eselikhulile, yingakho bebangela amakilabhu anjenge-Al Ahly neZamalek ukushisa.
"Kodwa-ke nathi sizethembile, sizokwenza konke okusemandleni ukunqoba njengoba sidlalela ekhaya."
La makilabhu ake abhekana esigabeni samaqoqo kuwona lo mqhudelwano ngo-2023. Abambane ngo-0-0 emlenzeni wokuqala obusePitoli, iDowns yanqoba ngo-1-0 ekuhambeni.
NGU-FADLU Davids ongumqeqeshi weSimba SC yaseTanzania ethwelwe ngabadlali bakhe.
ISITHOMBE NGABE: BACKPAPEPIX
Khonamanjalo, iSimba SC yaseTanzania elolongwa nguFadlu Davids waseNingizimu Afrika, izobhekana neBerkane yaseMorocco emlenzeni wesibili kowamanqamu weCaf Confederation Cup ngeSonto ngo-15h00 eTanzania.
IBerkane isiyibambe ngesandla esisodwa le nkomishi kwazise emlenzeni wokuqala obuseMorocco ngeledlule, inqobe ngo-2-0. UDavids uthi u-2-0 basengawukhava njengoba bedlalela ekhaya.
Ilanga Lempelasonto