Kukhuzwa abalandeli abahhewula abadlali beDowns

NGUMQEQESHI weDowns, uMiguel Cardoso.

ISITHOMBE NGABE: BACKPAGEPIX

Senso Sokhela

UKHATHAZWA yisihluku esenziwa ngabalandeli beMamelodi Sundowns, sokuhhewula abadlali bezakhe uMiguel Cardoso ongumqeqeshi wale kilabhu eseyibuyele esicongweni se-log yeBetway Premiership.

IDowns izobhekana neSekhukhune United koweBetway Premiership ngeSonto ngo-15h30 eLoftus Versfeld Stadium, ePitoli.

Iya kulo mdlalo nje, ihambela phezulu emuva kokuguqisa AmaZulu FC ngo-1-0 wegoli likaMarcelo Allende koweBetway Premiership ngoLwesibili ebusuku eThekwini.

UCardoso uzwakalise ukunengeka ngokuhhewulwa kwabadlali bakhe ngabalandeli beDowns beyozifudumeza ngaphambi komdlalo woSuthu.

NGU-AUBREY Modiba ejabula nozakwabo, uMarcello Allende oshaye igoli ngesikhathi iDowns ihlula AmaZulu ngo-1-0 koweligi.

ISITHOMBE NGABE: BACKPAGEPIX

Uthi lesi yisihluku esingamukelekile.

"Njengoba siya kulo mdlalo weSekhukhune sidinga abalandeli bethu ukuba baseseke ngoba sisempini enzima, usizo lwabo siyaludinga.

"Ukunqoba kwethu kulele kubona ngoba abadlali bethu bazizwa bevikelekile uma besekwa yibona. Kodwa-ke ngeke ngikufihle ukuthi kungizwise ubuhlungu okwenziwe ngabalandeli bethu kubadlali bethu ngesikhathi singena enkundleni ukuyozifudumezela umdlalo wamaZulu, bavele bahhewula abadlali bethu.

"Kangiyithandanga le nto abayenzile. Phela siwumndeni, kufanele sinikane uthando ngaso sonke isikhathi. Kuyisihluku esingabekezeleki ukuthi kuhhewulwe abadlali ngabalandeli okufanele engabe bayabeseka.

"Kodwa-ke nginethemba lokuthi kulo mdlalo weSekhukhune bazophuma ngobuningi babo bazoseseka ngoba sibadinga ngendlela eyisimanga," esho.