Mfanafuthi Ndlovu

UZOLWELA ukusonga isizini kunendebe ayiphakamisile uMiguel Cardoso ongumqeqeshi weMamelodi Sundowns eqhathwe ne-Al Ahly yaseGibhithe kwi-semi final yokuqala yeCaf Champions League ezokuba ngoMgqibelo ngo-15h00 eLoftus Stadium, ePretoria. 

Kweyesibili kuzotholana phezulu i-Orlando Pirates nePyramids yakhona eGibhithe emdlalweni ozokuba ngawo uMgqibelo ngo-18h00 eFNB Stadium, eSoweto.

IPirates ilwela ukuthola inkanyezi yesibili kuqala kuneDowns njengoba womabili la makilabhu enayo emuva kokunqoba lesi sicoco ngo-1995 nango-2016 ngokwahlukana.

URELEBOHILE Mofokeng wePirates, oxinwe ngu-Akram Bouras weMC Alger, yase-Algeria, kulindeleke ukuba asize ezakhe uma sezibhekene nePyramids.

ISITHOMBE NGABE: BACKPAGEPIX

UCardoso utshele abezindaba ukuthi uzimisele ngokuhamba aze ayofinyelela kowamanqamu walo mqhudelwano ongomkhulukazi kwedlalwa ngamakilabhu ase-Afrika.

"Sizobhekana nomdlalo onzima. Izitha zethu ziyiqembu eliqinile impela futhi zizosinika inselelo. Kufanele sibahlule kumnyama kubomvu. Ngiyazi ukuthi bahlale besijulukisa kanzima. Ngakho-ke kufanele sizame konke okusemandleni ethu ukubanqoba ekhaya," esho.

Uthe unalo ithemba lokuthi bazokwazi ukudlulela kowamanqamu yize bebhekene nobunzima njengoba benemidlalo eminingi yeBetway Premiership esabahlalele.

"Kubalulekile ukuthi silwele ukuphakamisa izindebe zale miqhudelwano esisasele kuyona (iBetway neChampions League)," esho.

NGU-EMAM Ashour oyithemba le-Al Ahly ekubhakuziseni inethi.

ISITHOMBE NGABE: BACKPAGEPIX

UCardoso ulindele ukuthi ezakhe zidlale kangcono uma sezibhekene ne-Al Ahly kungafani nezikwenze zikhishwa yiKaizer Chiefs ngo-2-1 kwiSemi final yeNedbank Cup ebingeledlule khona eLoftus Stadium.

"Kasibanga nomdlalo omuhle sibhekene neChiefs. Bekufanele senze kangcono futhi ngikholwa wukuthi sisengenza kangcono. Kakumele sizijezise ngomphumela odlule. Kulo mdlalo we-Ahly kumele sidlale ngamandla engeziwe ukuze singehlulwa kuwona," esho.

UJayden Adams odlala esiswini kwiDowns, ubona ukuthi leli yithuba elihle labo lokuziveza kulo mdlalo we-Al Ahly, akholwa wukuthi uzokuba nzima.

IDowns iya kulo mdlalo ibeke amathemba ayo kuPeter Shalulile, u-Iqraam Rayners noLucas Ribeiro okumele bangawashiyi amakhokho okubhakuzisa amagoli.

I-Al Ahly yona iwabeke kubadlali bayo ababalwa nabahamba phambili ngokuhlohla amagoli kulo mqhudelwano; okungu-Emam Ashour (5), u-Abou Ali (3) noHussein Al Shahat (3)