Basonga ukuvuka ngeChiefs abeDurban City

NGU-TERRENCE Mashego exine u-Athini Maqokolo wamaZulu FC

ISITHOMBE NGABE: BACKPAGEPIX

Mfanafuthi Ndlovu

ISONGA ukusikhiphela kwiKaizer Chiefs isibhongo sokukhishwa emqhudelwaneni omqoka iDurban City eqale ngonyawo oluhle kwiBetway Premiership.

IDurban City izogadulisana neChiefs koweBetway Premiership ngoLwesihlanu ngo-19h30 eMoses Mabhida Stadium, eThekwini.

Lo mdlalo uthathwa njengomkhulu eThekwini ngale mpelasonto njengoba kwaziwa ukuthi iChiefs inabalandeli ezweni lonke.

UTerrence Mashego odlala ophondweni lwesokunxele emuva kwiDurban City, uthi bafuna ukuvuka ngeChiefs.

Phela iCity isazikhotha amanxeba okukhishwa kabuhlungu yiRichards Bay FC ngo-3-1 kwiQuarter final yeCarling Knockout ngeledlule eMhlathuze Sports Complex.

NGU-ETIOSA Ighodaro (okwesobunxele) ejabulela igoli lakhe lokuqala edlubhe ijezi leChiefs, alishaye bequmba phansi iSimba yaseDRC koweCaf Confederation Cup. 

ISITHOMBE NGABE: BACKPAGEPIX

UMashego uthi kabafuni ukuphenduka ithofi lamanye amakilabhu - lapho wonke ezozenzela umathanda kubona - uthi bazobuyisa isithunzi sabo ngeChiefs.

"Esingeke sikubalekele wukuthi iChiefs yiyona eyizimfivilithi ukunqoba lo mdlalo kwazise thina sesihlulwe kwemibili ilandelana. Okuzoselekelela ukunqoba lo mdlalo wukuthi siqinise emuva, singayivumeli ukuthi ithole igoli kuqala.

"Kuzofanele futhi sigweme ukwenza amaphutha awubungane ngoba emidlalweni edlule silinyazwe yilokho. Uma singagwema lezi zinto, noma kanjani sizoyimboza," kusho uMashego.

Isiyonke imidlalo yeBetway Premiership engempelasonto imi kanje:-
NGOLWESIHLANU
EMoses Mabhida Stadium: Durban City vs Kaizer Chiefs 19h30.
EDr Molemela Stadium: Siwelele vs Sekhukhune United 19h30.
NGOMGQIBELO
ELoftus Versfeld Stadium: Mamelodi Sundowns vs Orlando Pirates 15h30.
E-Olympia Park: Orbit College FC vs Magesi FC 15h30.
E-Old Peter Mokaba Stadium: Polokwane City vs Richards Bay 18h00.
Buffalo City Stadium: Chippa United vs AmaZulu FC 20h15.
NGESONTO
EMbombela Stadium: TS Galaxy vs Stellenbosch FC 15h30.
EKing Zwelithini Stadium: Golden Arrows vs Marumo Gallants 18h00.