Ugezeke inhliziyo umnikazi weDurban City ngesipho sikaKhisimusi

NGUTHABO Nodada (okwesokudla) ejabula nozakwabo emuva kokushaya elinye lamagoli ezakhe ziguqisa i-Orbit College ngo-3-0.

ISITHOMBE NGABE: BACKPAGEPIX

Mfanafuthi Ndlovu

UHLABEKE umxhwele uSihlalo weDurban City, uFarook "Ntshebe" Kadodia ngokuvala unyaka kwale kilabhu ngegiya eliphezulu ngaphansi kukaPitso Dladla onikwe umsebenzi wokuba yibamba lomqeqeshi, kuxoshwa uGavin Hunt obesephikwa yimiphumela muva nje.

I-City ivuke indlobane ibhudluza i-Orbit College ngo-3-0 koweBetway Premiership ngoLwesithathu ebusuku e-Olympia Park, eRustenburg.

 Inqobe ngegoli likaThabo Nodada, elikaLetsie Koapeng nelikaHaashim Domingo.

Lo mphumela wenze uKadodia ongumnikazi weCity, waphuphuma injabulo njengoba ezakhe bezibuya esibhaxwini sika-2-0 ezisinikwe yi-Orlando Pirates ngoMgqibelo eMoses Mabhida Stadium, eThekwini - okwenze izinyawo zagcwala udaka kuHunt.

NGUPITSO Dladla obambe esigqikini sokulolonga iDurban City, kanti emuva kwakhe kuPogiso Makhoye oqeqesha i-Orbit College..

ISITHOMBE NGABE: BACKPAGEPIX

NoDladla uzwakalise injabulo enkulu ngalo mphumela njengoba ethe yinto abebeyifisa ukuvala unyaka ngegiya eliphezulu.

Uthe kufanele kunconywe abadlali ngokuyibamba ngobuqotho nokuzethemba ensimini. Uthe ubone ngesikhathi besazivocavoca nje ukuthi nakanjani amaphuzu amathathu bazowathatha, ngendlela abebezinikele ngayo.

"Bebewufuna lo mdlalo kwazise ngowokugcina ngaphambi kwamaholidi kaKhisimusi. Ngesinye isikhathi siyaye siwuhlelele umdlalo ngendlela, kepha izinto zingenzeki, kulokhu konke kuhambe ngokohlelo. Kufanele sincome indlela abadlali abakhombise ngayo ukulambela ukunqoba ekubeni besisekuhambeni.

"Sikwazile ukuvala kahle emuva. Ngiyazi ukuthi besijwayele ukungenelwa ngamagoli ngenxa yokunganaki. Izitobha zethu zikwazile ukuvala kahle umdlalo uqala waze wayophela.

"Nabagadli bakhombisile ukuthi bazimisele ukulwela ibheji lekilabhu. Lo mphumela usho lukhulu kubalandeli bekilabhu, bekumqoka ukuba siwunqobe, ukuze siye emaholidini sinqobile," esho.

UKadodia uncome ithimba labaqeqeshi, nabo bonke abathintekayo eqenjini ngokubuya namaphuzu agcwele ekuhambeni okube yisipho esihle sikaKhisimusi.