18 | Ezemidlalo
Friday, 20 February 2026
NGUMANQOBA Mngqithi ongumqeqeshi we-Arrows, enika umyalelo omuney wabadlali bakhe, uJunior Dion.
ISITHOMBE NGABE: BACKPAGEPIX
Umqeqeshi uphonsela umdlali we-Arrows inselelo
Abafana Bes'thende bazogijima owendebe ngaphandle kwenjini yabo yase-Ivory Coast
Senzo Sokhela
UPHONSELA inselelo injini yeLamontville Golden Arrows edabuka e-Ivory Coast ukuqhubeka nokusebenza kanzima umqeqeshi wale kilabhu, uManqoba "TV" Mngqithi.
U-Isaac Cisse (19) wase-Ivory Coast useqalile ukudonsa iso lamakilabhu ahlukene aseNingizimu Afrika, njengoba esibamba ngqi isisu saBafana Bes'thende abazogadulisana neStellenbosch FC koweLast 16 yeNedbank Cup ngoMgqibelo ngo-18h00 eKing Zwelithini Stadium, eMlazi.
I-Arrows izokuya kulo mdlalo ngaphandle kukaCisse njengoba ethole ikhadi elibomvu behlula iMagesi FC ngo-2-0 ngeledlule eSeshego Stadium, eLimpopo.
UCisse ungene kwezwakala kwiPremiership njengoba esibamba sithule du isisu se-Arrows. Ufike kwi-Arrows ekuqaleni kwale sizini.
NGU-ISAAC Cisse, obelethwe nguJunior Dion, okuvela ukuthi kunamakilabhu amfunayo.
ISITHOMBE NGABE: BACKPAGEPIX
Kuvela imibiko ethi iMamelodi Sundowns iyamcathamela lo mdlali.
UMngqithi ebuzwa ngoCisse, uthe: "Uyeza yena kangifuni ukuqamba amanga. Ziningi futhi nezinto esezikhulunywa ngaye. Kodwa ngokwami usemncane, kuningi okusafanele kulungiswe kuyena, usenza amaphutha awubungane.
"Inkinga yakhe enkulu wukuthi unokubuye aphisane ngebhola ezindaweni ezibucayi.
"Kodwa yena unekhono eliyisimanga, usinika okuhlukile lapha ekilabhini. Maduzane ngizosho ukuthi usephelele kokudingeka kumdlali oyinjini.
"Nokho okwamanje, ngoba ngimubukela eduze ejimini, ngingathi unalo ikhono kepha kusafanele asebenze kanzima ngoba kunezinto ezisashoda emdlalweni wakhe."
Ilanga Lempelasonto