INTATHELI yeLANGA

UZOSEBENZISA ukudlala kwiKaizer Chiefs njengethuluzi lokufeza iphupho lakhe lokudlala kwiBafana Bafana u-Ethan "Jesu" Chislett (26), osanda kujoyina iziMpofana, evela eNgilandi.

ILANGA Lempelasonto lithole isikhathi sokuphuza ikhofi nalo mdlali wasesiswini owazalelwa eThekwini, kodwa wahamba esemncane, umndeni wakhe wafudukela eNgilandi.

UChislett uthi kuwumuzwa angeke awuchaze ukuyodlala eThekwini njengoba ezakhe zizobhekana ne-Asante Kotoko yaseGhana koweToyota Cup ngomhla ka-26 kwephezulu eMoses Mabhida Stadium.
Kukhulu osekushiwo ngalo mdlali okubhekwe lukhulu kuyena, kodwa simphonse imibuzo embalwa ngezinto ezithinta yena ngqo.

Ingxoxo ihambe kanje:-
Umbuzo: Yiyiphi ikilabhu oyilandelayo ngaphandle kweChiefs?
Chislett: YiLiverpool, yaseNgilandi.
Umbuzo: Yimuphi umdlali obukela kuyena?
Chislett: NguDavid Silva (waseSpain, ozakhele igama kwiManchester City).

NGABADLALI beqembu lesizwe laseSpain - uChislett athi uyazifela ngalo - uLamine Yamal noNico Williams.

Umbuzo: Yiliphi iqembu lesizwe olithandayo ngale kweBafana?
Chislett: Ngingathi yiSpain, ngoba idlala uhlobo lwebhola engilithandayo.
Umbuzo: Yiyiphi inombolo oyigqokayo, kanti kwiChiefs bakunike yiphi?
Chislett: Ngithanda unombolo 10 ngoba yiyona ndawo engiyidlalayo enkundleni. La kwiChiefs nginikwe unombolo 23, futhi ngijabule. UMichael Jordaan (odlala i-basketball) ongomunye wabantu abahlonishwayo kwezemidlalo, ugqoka u-23, ngiyethemba ukuthi ngizoyihlonipha le nombolo ngokwenza kahle ensimini.

Yi-CAPE Town okuyidolobha lo mdlali afisa ukuvakasha kulona.

Umbuzo: Uthanda kudla kuni?
Chislett: Ngithanda isiteki (inyama ebomvu).
Umbuzo: Uthanda yiphi imoto?
Chislett: Ngiyazifela ngePorsche 911.
Umbuzo: Yiyiphi indawo othanda ukuvakashela kuyona?
Chislett: YiseCape Town naseMhlanga (eThekwini).
Umbuzo: Usuthathile?
Chislett: Angikaganwa, kodwa nginesinqandamathe seminyaka eyisikhombisa. Nginethemba lokuthi njengoba sengilapha, naso sizoza, siqhubele into yethu phambili.