Mfanafuthi Ndlovu

AKAKUGQIZI qakala ukuhambela phezulu kweKaizer Chiefs umqeqeshi weChippa United, uThabo September njengoba la makilabhu ezotholana phezulu koweBetway Premiership ngoMgqibelo ngo-17h30 eNelson Mandela Bay Stadium, eGqeberha.

USeptember uthi ugqozi lwabo ludalwa wukuthi emidlalweni emithathu asebeyigijimile, kabazange bangenelwe yigoli, okubanika omkhulu umdlandla ngaphambi kwalo mdlalo.
Uthi bazogxila ekuqinisekiseni ukuthi lo mgqigqo abahamba ngawo kawuphazanyiswa yiChiefs.

Uthi bayazi ukuthi iChiefs ihambela phezulu kulezi zinsuku njengoba ikhiphe iMamelodi Sundowns kwiSemi final yeNedbank Cup ngeledlule, okuyenze yangena kwiCaf Confederations Cup yangesizini ezayo.

NGUTHABO September (okwesobunxele) encokola nethimba labaqeqeshi beLamontville Golden Arrows; uKagiso Digacoi (ophakathi) noMusa Bilankulu.

ISITHOMBE NGABE: BACKPAGEPIX

Lokhu kudalwa wukuthi kowamanqamu iChiefs izobhekana ne-Orlando Pirates ezobuyela kwiCaf Champions League nangesizini ezayo.

"Okuhle wukuthi abadlali kabadingi ukukhuthazwa uma bezobhekana neChiefs ngenxa yobukhulu bayo.

"Ngijabulela ukuthi munye kuphela umdlali ozokube engekho ngenxa yesigwebo samakhadi, bonke abanye bawulungele ngokuphelele lo mdlalo," esho.

Lo mdlali abekhuluma ngaye uSeptember -  ukuthi uzokube engekho - ngu-Azola Matrose (21) abamthatha kwi-Orlando Pirates, olihlikihla esiswini.

NoGiven Msimango weChiefs utshele leli phephandaba ukuthi bawafuna ephelele amaphuzu alo mdlalo njengoba befuna ukusonga isizini bekwi-top 8 ebahlulile ngesizini edlule.

Isiyonke imidlalo yeBetway Premiership imi kanjena:
NGOLWESIHLANU
EKing Zwelithini Stadium: Richards Bay vs Cape Town City FC 19h30.
NGOMGQIBELO
EDr Molemela Stadium: Marumo Gallants vs Golden Arrows 15h00.
ENelson Mandela Bay Stadium: Chippa United vs Kaizer Chiefs 17h30.
EPeter Mokaba Stadium: Sekhukhune United vs Polokwane City 17h30.
NGESONTO
ESeshego Stadium: Magesi FC vs TS Galaxy 15h00.