Nhlanhla Hudla

ITHEKU lihlabane ngomdlalo omqoka weKaizer Chiefs ne-Asante Kotoko yaseGhana womqhudelwano iToyota Cup, ozokuba ngoMgqibelo womhla ka-26 kuJuly eMoses Mabhida Stadium, eThekwini.

IChiefs imemezele lokhu ngoLwesine emini ngesikhathi inesigcawu nabezindaba ekomkhulu layo eNaturena, eGoli.

UJessica Motaung ongesinye sezikhulu zeChiefs, uthe inhloso yalo mdlalo wukuhlanganisa abalandeli bebhola e-Afrika, nokubungaza abadlali abadala bale kilabhu njengoba kuzodlala nezingwazi zaKwaZulu-Natal ezizokube ziholwa nguSibusiso "Rhee" Zuma, zibhekene nezeChiefs.

UZuma wazakhela igama egijima kwi-African Wanderers, yi-Orlando Pirates, yiFC Copenhagen yaseDanmark - emhloniphe ngesichuse kuleliya lizwe - yi-Arminia Bielefeld yaseGermany neMamelodi Sundowns - ukubala abambalwa.

Yomibili le midlalo izokhonjiswa bukhoma kwiSABC 1, kanti umlandeli oyedwa uzophuma enkundleni esehamba ngonyanyavu lwemoto yakwaToyota ezowinwa ngosuku lwalo mdlalo. 

Ozonqoba uphakathi kwalabo abazothenga amathikithi okubuka lo mdlalo eShoprite, bese bebhalisa amagama abo.

NGU-SIBUSISO Zuma (ongaphambili) enoJoseph Ngake ngezikhathi zabo besagijima kwiPirates.

ISITHOMBE NGABE: BACKPAGEPIX

UTasneem Lorgat wakwaToyota, uthe bajabule ngobudlelwano obukhona phakathi kwabo naMakhosi. Uqhube ngokuthi ufisa ukuba buqhubeke buye phambili.

Nyakenye amathikithi alo mqhudelwano owawugijinyelwa eFree State, adayiswa aphela kanti kulindeleke okufanayo nanonyaka.

IChiefs iyalithanda iTheku njengoba lifana nekhaya layo lesibili. Yikuleli dolobha lapho eqede khona ishobolo leminyaka ewu-10 ingayazi inkomishi, ngesikhathi inqoba iPirates ngo-2-1 kowamanqamu weNedbank Cup ngesizini edlule.