Umyalezo oshubile kwabeSundowns ngeligi

NGUMQEQESHI weSundowns, uMiguel Cardoso.

ISIRTHOMBE NGABE: BACKPAGEPIX

Senzo Sokhela

UTHUMELE umyalezo oshubile kubadlali bakhe ngesicoco seBetway Premiership umqeqeshi weMamelodi Sundowns, uMiguel Cardoso, ethi kufanele bashintshe ukwenza ngokushesha uma besafuna ukusigcina eChloorkop.

IDowns ilahle amaphuzu amqoka ibambana ngo-1-1 neMarumo Gallants koweBetway Premiership ngoLwesithathu ebusuku eDr Molemela Stadium, eBloemfontein.

Igoli leDowns lishaywe ngu-Iqraam Rayners, kwathi elokulinganisa leGallants lashaywa yiyona futhi iDowns, uKeanu Cupido elihlohla ngakubo.

IDowns ibhekene nomunye umdlalo onzima wombango wasesicongweni njengoba izodudulana neDurban City koweligi ngoMgqibelo ngo-20h00 eLucas Masterpieces Moripe Stadium, e-Atteridgeville.

NGUNDABAYITHETHWA Ndlondo weGallants edabula uDevine Lunga noMarcelo Allende beDowns.

ISIRTHOMBE NGABE: BACKPAGEPIX

UCardoso unxusa abadlali bakhe ukukhuphula amasokisi ukuze baqhubeke nokugcina isicoco seligi asebesiqukule iminyaka ewu-8 ilandelana.

"Uma abadlali bami befuna ukuvikela isicoco seligi kuzofanele bashintshe ukwenza, ngoba kayikho le nto esiyidlalayo njengamanje.
"Kulo mdlalo kasizange neze sidlale kahle, kasidlalisanga okwabantu abafuna ukuvikela isicoco sabo.

"Kuzofanele bazame ukwenyusa amasokisi ngoba isimo esibhekene naso sinzima, imidlalo yethu icinene.

"Kuzofanele sizame ukwenza isiqiniseko sokuthi siyanqoba kulo mdlalo weDurban City ngoba maduzane sizodlala iChampions League, okuzokwenza izinto zethu zibe nzima kakhulu kunakuqala," kusho uCardoso.

Isiyonke imidlalo yeBetway Premiership engempelasonto imi kanje:
NGOMGQIBELO
ESeshego Stadium: Magesi vs Siwelele 15h00.
EPeter Mokaba: Sekhukhune United vs Golden Arrows 15h00.
EDanie Craven: Stellenbosch vs Richards Bay 17h30.
ELucas Moripe Stadium: Mamelodi Sundowns vs Durban City 20h00.
E-Olympia Park: Orbit College vs Marumo Gallants 20h00.
NGESONTO
E-Old Peter Mokaba Stadium: Polokwane City vs Chippa United 15h00.