IPirates iyibona isazodonsa impi neDowns

NGUMQEQESHI wePirates, u-Abdeslam Ouaddou.

ISITHOMBE NGABE: BACKPAGEPIX

Senzo Sokhela

UKHOLWA wukuthi kuyolamula umzuzu wokugcina ngempi yesicoco seBetway Premiership umqeqeshi we-Orlando Pirates, u-Abdeslam Ouaddou.

IBucs izobhekana neSiwelele FC koweBetway Premiership ngoMgqibelo ngo-15h30 e-Orlando Amstel Arena, eSoweto.

Iya kulo mdlalo nje, iguqise iRichards Bay FC ngo-2-0 koweBetway Premiership ngoLwesithathu ebusuku e-Orlando Amstel Arena, eSoweto.

Amagoli ayo avalelwe enethini ngu-Oswin Appollis no-Evidence Makgopa, obekuyiphenathi.

U-Ouaddou ulibeke ngesihloko elokuthi impi yesicoco seligi uyibona izophela ngosuku lokugcina lwemidlalo njengoba kuwugingqigongqo kwezakhe neMamelodi Sundowns ngokuhlala esicongweni.
IPirates ibuyele phezulu emuva kokunqoba lo mdlalo weBay. 

USHIYE abadlali beBay abebeviva, bedumele u-Oswin Appollis wePirates, emuva kokuqobela phakathi igoli lokuqala la makilabhu ebhekene ngoLwesithathu.

ISITHOMBE NGABE: BACKPAGEPIX

ISundowns seyinqobe lesi sicoco amasizini awu-8 elandelana, iPirates ifuna ukuqeda lokhu kuchanasa kwamaSandawana.

"Amakilabhu asinika ubunzima ngale sizini yiRichards Bay neSiwelele, esizobhekana nayo. Uzokuba nzima umdlalo wethu neSiwelele.

"Kodwa-ke uma ufuna ukunqoba lesi sicoco kufanele uhlule wona la makilabhu anjengeSiwelele, ngoba kakulula neze ukubhekana nawo.

"I-PSL yiligi enkulu, kayilula neze njengoba namakilabhu akhona enzima. Noma kanjani sifuna ukuba yizingqwele, yingakho silwa ngalolu hlobo. Sizolwa kuze kube sekugcineni. Ngiyathembisa ukuthi sizofela enkundleni, kuyoze kulamule umzuzu wokugcina," esho.

Isiyonke imidlalo yeBetway Premiership ezokuba ngempelasonto iqhathwe kanje:
NGOLWESIHLANU
EDanie Craven: Stellenbosch vs TS Galaxy 19h30.
NGOMGQIBELO
ESeshego: Magesi FC vs Chippa United 15h30.
E-Orlando Amstel Arena: Orlando Pirates vs Siwelele 15h30.
ELucas Moripe: Marumo Gallants vs Golden Arrows 15h30.
EMoses Mabhida: AmaZulu vs Richards Bay 18h00.
EPeter Mokaba: Sekhukhune United vs Polokwane City 18h00.
NGESONTO
E-FNB Stadium: Kaizer Chiefs vs Durban City 15h30.