Usetshenzelwa nawukuziba izimfamona umqeqeshi weBafana

Senzo Sokhela

USETSHENZELWA wukungakugqizi qakala ukugxekwa uHugo Broos ongumqeqeshi weBafana Bafana oyifake okokuqala kwiNdebe yoMhlaba yeFifa ngezikhwepha zayo emuva kweminyaka ewu-24 izabalaza kanzima, kungalungi.

IBafana selokhu yagcina ukuzingenela kwindebe yomhlaba ngo-2002 emqhudelwaneni owawuseSouth Korea naseJapan njengoba ngo-2010 yasizwa wukuba ngosokhaya.

Iqashe uBroos ngo-2021 ngenhloso yokuba abuyise isithunzi salesi sikwati ebesesibukwa yizihlalo.

Ugxekiwe ethatha lo msebenzi, kwathiwa unekhanda eliqinile, ubophela abadlali abangenawo amagama.

Nokho ubavale imilomo bonke abebemgxeka ephendula iBafana inqanawe yeqembu, eselisatshwa e-Afrika.

Leli qembu lisematheni kubathandi bebhola emuva kokungena kwindebe yomhlaba ezokuba ngonyaka ozayo e-United States of America (USA), eCanada naseMexico.

Lizibekisele indawo kule midlalo emuva kokunenebula iRwanda ngo-3-0 kowokusonga u-group C ngoLwesibili ebusuku eMbombela Stadium, eMpumalanga. Amagoli eBafana ashaywe nguThalente Mbatha, u-Oswin Appollis no-Evidence Makgopa.

IBafana itakulwe yiSuper Eagles yaseNigeria ehlule  iBenin ngo-4-0 emdlalweni walo leli qoqo ngoLwesibili ebusuku eNigeria, okususe iBenin esicongweni, kwahlala iBafana.

NGUMGADLI weBafana, u-Evidence Makgopa ejabulela igoli lakhe ngesikhathi elakuleli libhudluza iRwanda ngo-3-0 ngoLwesibili.

ISITHOMBE NGABE: BACKPAGEPIX

UBroos uthumele umyalezo oshubile kulabo abebemgxeka uma kunabadlali abaqokile, abangahambisani nemizwa yabo.

"Ngikuqonda kahle ukuthi kunabebengavumelani nami ngeqembu ebengiliqoka kwesinye isikhathi. Kimina kumqoka ukuthi ngaso sonke isikhathi ube nabadlali abasezingeni eliphezulu, abanemiqondo ehluzekile, kube ngabadlali abazokwenza lokhu obatshele khona.

"Kuze kube yimanje, noma bebengigxeka bengilokhu ngiphumelela ngisho ngibize labo abanganikwa thuba. Ibhola lidinga ukuthi usebenze nabantu abahambisana nawe.

"Yiyona into ebesilokhu siyenza kule minyaka emithathu edlule. Kuyasijabulisa okwenzekile. Ngizwile nje omunye ethi iBafana iyihlaya, kazi uthini-ke manje uma sekunjena," kusho uBroos.

Lo mqeqeshi ubuye nethusi kwi-2023 Africa Cup of Nations (Afcon) ebingasekuqaleni kuka-2024 e-Ivory Coast, kanti uyifakile futhi iBafana kwi-2025 Afcon ezokuba seMorocco kusuka ngoDecember isongwe ngoJanuary wango-2026.