Baqoqe imiklomelo emqoka abasubathi beBoxer AC

NGU-GLENROSE Xaba oqoqe imiklomelo yeSpar Women's Challenge Grand Prix.

Mzwamandla Zondi

IQOQE yonke imiklomelo iBoxer Athletics Club (AC) emcimbini weSpar Women's Challenge Grand Prix eyimilenze eyisihlanu.

UGlenrose Xaba kube nguyena ingqwele yeSpar Grand Prix ngokuqeda enamaphuzu amaningi kunabanye, okwenze wakhala wemuka nesicoco sika-R200 000, wahlabana nango-R100 000 ngaphezulu ngokuba ngumsubathi wokuqala waseNingizimu Afrika ukufika entanjeni.

Lo msubathi - oqeqeshwa nguCaster Semenya - uqede lo mjaho enamaphuzu awu-120, kwathi uDiniya Abaraya noSalem Gebre baqeda endaweni yesibili nakweyesithathu ngokwehlukana.

NGU-KARABO Mailula, nguGlenrose no-Abaraya Salem, bobathathu abagoduke behleka bodwa emcimbini wemiklomelo yeSpar Women's Challenge Grand Prix.

UKarabo Mailula uqede endaweni yesine, wagoduka no-R50 000, wathola no-R70 000 ngokuba ngowesibili waseNingizimu Afrika, kwathi uKarabo More weBoxer AC, wathatha indawo yesihlanu okumzuzise u-R30 000 no-R50 000 ngokuba ngowesithathu waseNingizimu Afrika.
UGlenrose ngumsubathi wokuqala omnyama ukudla ubhedu amahlandla amathathu kwiGrand Prix.
Nonyaka wenze kahle njengoba eyinqobe yonke imilenze ewu-5 yeSpar egijinywa eCape Town, eThekwini, eGqeberha, eGoli naseTshwane ngokwahlukana.
Ingqwele ihlomula ngamaphuzu awu-20 umjaho nomjaho kwehle njalo kuze kufike kunombolo 20 othola elilodwa kanti kukhona namabhonasi.

NGU-GLENROSE noRyan Swanepoel oyimenenja yeBoxer AC, bephethe izindondo zalo msubathi.

UGlenrose ekhuluma nabezindaba ngemuva kokuhlabana ngalo mklomelo, uthe ujabule ngokuvikela isicoco sakhe.

Uthe umklomelo wanyakenye wawupha uninakhulu ukuze aqedele umuzi wakhe. Uthe akakazi ukuthi owamanje uzowenzani.

Lo msubathi kubhekwe lukhulu kuyena njengoba ngomhla ka-7 kuDecember ezokube eyingxenye yeValencia Marathon, eSpain.

Uthe nonyaka ubeziqeqeshela eValencia, kanti isifiso sakhe esikhulu wukwenza irekhodi lakuleli le-marathon, okumanje liwu-2:22, kanti liphethwe nguyena, walenza nyakenye kwiSanlam Cape Town Marathon.

Phakathi kwabasubathi beBoxer abenze kahle kulo mcimbi nguGlenrose, nguKarabo More, nguCacisile Sosobo (6), nguCarina Swiegers (9) noChanel Groenewald obe yijuniya lokuqala.