NGU-THOMAS du Toit ongenye yama-prop amaBhokobhoko.

ISITHOMBE NGABE: BACKPAGEPIX

Nhlanhla Hudla

UMDLALI wamaBhokobhoko, uThomas Du Toit, uthi bayilungele inselelo abazobhekana nayo emdlalweni wabo ne-Ireland weCastle Lager Outgoing Tour ngoMgqibelo eDublin, e-Ireland.

Elakuleli selinqobe imidlalo emithathu yalolu chungechunge lokusonga unyaka. Livule ngokuxebula iJapan ngo-61-7, lalandelisa ngeFrance (32-17), kanti ngeledlule lithele othu-lini i-Italy ngo-32-14.

Umdlalo wamaBhokobhoko ne-Ireland uthathwa njengowamagqubu kwazise nakwiNdebe yoMhlaba ye-IRB ngo-2023 eFrance, i-Ireland yiyona kuphela eyakwazi ukushaya AmaBhokobhoko kowamaqoqo.

Sekuwumlando ukuthi elakuleli yilona elagcina liyinqobile le nkomishi ihlandla lesibili kulandelana, okwenza kwaba ngokwesine emlandweni walo. Layiqukula ngo-1995 kuleli, ngo-2007 nango-2023 eFrance, nango-2019 eJapan.

Ekhuluma ngaphambi kwalo mdlalo uDu Toit, uthe kabayile ukuyoziphindeselela, kodwa bahlose ukuqeda ishobolo lokungenzi kahle uma bedlala naleliya lizwe.

"Siyazizwa izinkulumo emaphepheni nasemisakazweni ngalo mdlalo.

"Thina siwubuka ngelinye iso njengoba sifuna ukunqoba kuleliya zwe ngenhloso yokuqhubeka nokwenza kahle emidlalweni yethu. Okwenzeke eminyakeni edlule sesakudlulisa. Njengamanje sibhekise imiqondo yethu emdlalweni wangempelasonto.

"Sizoya kuwona ngenhloso efanayo nakule midlalo edlule, okuwukwenza kahle," esho.

NGU-OX Nche oyi-prop yamaBhokobhoko, oqokelwe emunxeni weRugby Player of the Year.

ISITHOMBE NGABE: BACKPAGEPIX

Lo mdlali ube esebongela uzakwabo, u-Ox Nche ngokuba yi-prop - okungumdlali ogijima unombolo 1 noma u-3 - yokuqala eNingizimu Afrika ukuqokelwa kwiMen's Rugby Player of the Year Award.

Abanye abakuleli abaqokiwe nguPieter-Steph du Toit owayinqoba nyakenye noMalcolm Marx. Laba bazobanga lo mklomelo noLouis Bielle Biarrey waseFrance.

"U-Ox uzithobile futhi uyazimesela kwakwenzayo. Kuyajabulisa ukuthi umsebenzi wakhe uyabonakala.

"Ngimfisela inhlanhla. Noma ngabe ugcina engawuthathanga lo mklomelo, kodwa okubalulekile wukuthi umsebenzi wakhe uyaziveza," esho.

Emuva kwalo mdlalo AmaBhokobhoko azogadulisana neWales, kowokugcina walolu chungechunge.