Uza nokwehlukile umcimbi iMayine Gospel Experience – Silent Worship Edition

UMPUMI Mtsweni ungomunye wabazobe bebusisa abathandi bomculo wokholo eDurban Christian Centre, eThekwini.

Thandi Zondi

UZA nezihlabani emculweni wokholo umcimbi iMayine Gospel Experience – Silent Worship Edition ozokuba mhla ka-22 May, eDurban Christian Centre (DCC – Jesus Dome).

Kulo mcimbi kuzokube kuboshelwe uNtokozo Mbambo, uNcebakazi Msomi, uMpumi Mtsweni, u-Oncemore Six, uKhaya Mthethwa noLusanda Beja. Abahleli balo mcimbi baziwa ngokuhlela umcimbi oba minyaka yonke wokwehlukanisa unyaka, iMayine Crossover Gospel Experience obanjelwa eNkosi Albert Luthuli Internatinal Convention Centre (ICC) eThekwini.

UKHAYA Mthethwa naye uzokube eyingxenye yomcimbi.

Kulo mcimbi, iMayine Gospel Experience – Silent Worship Edition, izihambeli zizothola ithuba lokulalela umculo kusetshenziswa okokulalela (wireless headphones).

"Nakuba umcimbi wokwehlukanisa unyaka kuyiwo omkhulu kwesiyenzayo, kodwa manje sizama indlela yokuthi abantu bathole umculo ngendlela eyehlukile. ISilent Worship Edition yehlukile futhi ikwazi ukukunika nesikhathi sokuba ujule ekukhonzeni noma ekudumiseni," kuchaza abahleli bomcimbi.

NGUMCILI weGospel uNtokozo Mbambo.

Bathi le ndlela ehlukile yokwenza ibidingeka ngenhloso yokuhambisana nezikhathi. Le yokusetshenziswa kwama-headphones isho ukuthi ngeke uzwe msindo walapho kwenzelwa khona umcimbi, noma kukhona omemezayo, kodwa umculo nezwi kuya ngqo ezindlebeni zakho, ukuze ukwazi ukubusiseka nokuxhumana noNkulunkulu.

Amathikithi aseqalile ukudayisa eWebtickets kanti abiza u-R250. Umcimbi uzoqala ngo-18h00 ntambama.