IKwaZulu-Natal ilele isibili ngesibalo sabangenele iComrades Marathon

Mzwamandla Zondi

IGAUTENG ihamba phambili ngesibalo sabasubathi abawu-8 326 (44%) abangenele iComrades Marathon yanonyaka, ezokuba mhla ka-14 kuJune, isukela eThekwini isongwe eMgungundlovu.

Umjaho wanonyaka ngoka-99, kanti owokuqala wagijinywa ngo-1921.

IComrades ike yaphazamiseka ngesikhathi sempi yesibili yomhlaba, kwaphinda kwaba ngesifanayo ngesikhathi umhlaba ugonqile ngenxa yeCovid 19 ebidlange ngo-2020 nango-2021.

IGauteng kuthiwa ilandelwa yiKwaZulu-Natal ngabawu-3 585 (19%). I-Eastern Cape ilele isithathu ngabawu-1 985 (11%) kuze iWestern Cape ngabawu-1 951 (10%) kulandele iLimpopo ngo-5% (865).

Ngemuva kweLimpopo kulele iMpumalanga eno-4% (831) kube yiFree State ngo-542 (3%) eshiyana kancane neNorth West enabasubathi abawu-517 (3%) kuvale iNorthern Cape ngabawu-173 okuwu-1%.

NGUTETE Dijana (okwesobunxele) oyingqwele yeComrades, enoPiet Wiersma owanqoba lo mjaho ngo-2024.

Umjaho wanonyaka ubhekwe ngabomvu njengoba kuyiwa kowekhulu ngonyaka ozayo, ozoqala eMgungundlovu usongwe eThekwini.

Nonyaka kuzokube kunezinto eziningi ezintsha kulo mjaho.

Uzokube uhlukaniswe izigaba ezintathu zokuqala.

Abokuqala (Group 1) bazoqala ngo-5 ekuseni okuwuBatch A kuya ku-G - abazokube befake izinombolo eziphuzi - kulandele (Group 2) uBatch B (H kuya kuM) wona ozoqala ngo-05h15 - abazokube befake izinombolo ezi-orange.

Okubalulekile wukuthi uBatch H uzoqala ngemuva kukaGreen Number - okungabasubathi asebegijime lo mjaho amahlandla awu-10 kuya phezulu, bazokube behambisana nabeComrades Marathon Race4Charity, abakwazi ukwenza imali ewu-R6 000 kuya phezulu.

NGU-GERDA Steyn okubhekwe ukuba avikele isicoco sakhe seComrades Marathon.

Abasubathi beGreen Number nabeCharity abanesikhathi esingaphansi kuka-4:03:00 bazongena kuGroup 1 ngenxa yezikhathi ezisheshayo abazenzile.

Kuzovala uGroup 3 ozoqala ngo-05h30 abazokube befake izinombolo ezi-blue okuwu-Batch N kuya ku-R

Kulo mjaho kubhekwe ngabomvu uGerda Steyn ukuba aqhubeke nokuchanasa kwabesifazane kanti esigabeni sabesilisa umjaho uzokube uvulelekile.