22 | Ezemidlalo
Friday, 15 May 2026
NGU-REEVE Frosler weChiefs.
ISITHOMBE NGABE: BACKPAGEPIX
IChiefs isabisa ngokuqeda ngoSuthu esibayeni salo
Iqashe isikhulu esisha esizobika ngqo kubaqondisi ngokwenzeka kule kilabhu
Mfanafuthi Ndlovu
IHLOSE ukuvala isizini ngenothi eliphezulu iKaizer Chiefs eqhathwe namaZulu FC koweBetway Premiership ngoMgqibelo ngo-15h00 eMoses Mabhida Stadium, eThekwini.
Lokhu kuzwakaliswe nguReeve Frosler oyisitobha seChiefs - ehambela phezulu kulezi zinsuku njengoba seyisimende indawo yesithathu kwi-log, okuzokwenza ukuba igijime emqhudelwaneni weCaf Confederation Cup ngesizini ezayo.
UFrosler uthi bawafuna ephelele amaphuzu alo mdlalo, ukusonga isizini ngenothi elihle, okungenza nokuthi baqale ezayo ngomfutho.
Uthi bahlose ukugcina abalandeli babo bejabule njengoba behlale bephuma ngobuningi uma le kilabhu idlala eThekwini.
NGU-FROSLER enokaputeni wakhe, uZitha Kwinika, osekunesikhashana wagcina ukubonakala enkundleni, ngenxa yokulimala.
ISITHOMBE NGABE: BACKPAGEPIX
Emdlalweni odlule iChiefs iguqise iSekhukhune United ngo-2-0.
UFrosler uthi bafuna ukuqeda le sizini benamaphuzu awu-57, okuyisibalo osekunesikhathi eside bagcina ukusihlanganisa.
Phela kumasizini amabili adlule, iChiefs beyehluleka wukuqeda kwi-top 8, obekuyiphuthisela ngeMTN8, okuyinto ebicasula kakhulu abalandeli bayo.
NGUBHEKI Shongwe.
* Kuzo ezeChiefs, iqashe uBheki Shongwe ukuba yi-group chief executive officer.
Kuthiwa uzokuba yiso kukho konke okuzokube kwenzeka kule kilabhu, kanti uzobika ngqo kusihlalo wale kilabhu, uKaizer "Shintsha Guluva" Motaung, nakwibhodi labaqondisi beziMpofana.
Ilanga Lempelasonto