Bafuna ukuvalelisa umqeqeshi wePirates ngendebe

IChiefs izophisana ngamathikithi kubalandeli eWorkshop, eThekwini

Mfanafuthi Ndlovu

BAFUNA ukuvalelisa umqeqeshi we-Orlando Pirates ngesitayela abadlali bale kilabhu ezogadulisana neKaizer Chiefs kowamanqamu weNedbank Cup ngoMgqibelo ngo-15h30 eMoses Mabhida Stadium, eThekwini.

UTapelo Xoki ongomunye wezitobha zeBucs, utshele ILANGA Lempelasonto ukuthi bazimisele ngokusinqobela uJose Riveiro ongumqeqeshi wePirates osethi khumu kule kilabhu uma kuphela le sizini.

URiveiro usemgqeni wokuhola le kilabhu ngempumelelo kuyona yonke imidlalo yamanqamu eyigijime esebhentshini njengoba engakaze ehlulwe kwifayineli selokhu ejoyine iBucs kumasizini amathathu adlule.

Unqobe iMTN8 kathathu kulandelana neNedbank kabili. Nayo uma eyinqoba kuzokuba ngokwesithathu kulandelana okuzokuba wumlando omusha kwiPremier Soccer League (PSL) ukuthi umlolongi anqobe izindebe ezimbili kathathu kulandelana.

"Sinalo ithemba lokuthi sizokwenza kahle uma sesibhekene neChiefs. Okubalulekile wukulwela ukuqopha umlando wokuqukula indebe ukuze ezohamba ngesitayela umqeqeshi wethu (uRiveiro).

"Konke sekulele kithina singabadlali ukufeza lesi sifiso sethu. Siyakuqonda ukuthi sibhekene nekilabhu ezimisele (ngokuqeda indlala yezicoco yeminyaka ewu-10). Okumqoka wukuthi silwele ukuqukula le ndebe sikhohlwe wukuthi sidlala nezimbangi zethu ezinkulu," esho.

KUZOFUNEKA adle asuthe uMduduzi Shabalala weChiefs uma efuna ukudlula kuTapelo Xoki (ophethe ibhola) wePirates kowamanqamu weNedbank Cup eMabhida.

Kubhekwe ukuba iPirates ifike kulo mdlalo bengawakhohliwe amakhokho okushaya amagoli abagadli bayo u-Evidence Makgopa, noRelebohile Mofokeng.

KwiChiefs kuzokube kubhekwe kakhulu uThabo Cele waKwaMashu ozokube eqala ukudlala owamanqamu eMabhida, phambi komndeni wakhe kungafani noThalente Mbatha waKwaMashu ogijima kwiBucs.

* IKaizer Chiefs izokube iphisana ngamathikithi alo mdlalo kubalandeli bayo ngoLwesihlanu kusuka ngo-12 emini kuya ku-17h00 eWorkshop, eThekwini. Bazobuye baphisane nangezinye izinto zakwaVodacom.