NGU-JOHN Mathane.

Mzwamandla Zondi
 
LINGASE ligcwale umoya ibhantshi kuJohn Mathane ohola i-Athletics South Africa (ASA), osolwa ngokusebenzisa budlabha imali yenhlangano ngokuhamba neqembu lika-U/20 ebelibambe iqhaza e-Oregon, e-United States of America (USA).

UMathane obambe isikhundla sokwengamela i-ASA, emuva kokumiswa kukaJames Moloi ongumengameli wale nhlangano, kuthiwa naye angase amiswe ngenxa yalesi senzo asolwa ngaso.

Kuthiwa akayazisanga ibhodi ye-ASA ukuthi uya kulo mqhudelwano.

NoMoloi umiselwe ukusebenzisa ikhadi lale nhlangano, ethenga iziphuzo ezishisayo nokukhithiza ngalo ezitolo zezingubo zabantu besifazane - ukukha nje phezulu.

UMathane usolwa ngokuya e-USA nje, iqembu lakuleli ebeliye kulowaya mqhudelwano, lacelwa ukuba lizihlanganisele imali yalolu hambo ngoba kuthiwa i-ASA kayinayo imali.

Kuthiwa ibhodi ye-ASA ibihlangene ngoLwesibili, yanika uMathane izinsuku eziwu-7 ukukhokha imali ahambe ngayo.

NGU-STEVE Mkasi.

Kuthiwa uma ehluleka angase amiswe, isikhundla sakhe, sithathwe nguJean Vester ongusihlalo weTrack and Field.

Isenzo sikaMathane kuthiwa sidine abantu abaningi kwazise uhamba nje, i-ASA kayimile kahle kwezemali, kanti nasezinkundleni zokuxhumana sigxekwe kakhulu isenzo salesi sikhulu.

Kwenzeka lokhu nje, neKwaZulu-Natal Athletics (KZNA) iphethwe nguKhulezweni "Khura" Buthelezi oyisekela likamengameli, emuva kokumiswa kukaSteve Mkasi.

UMkasi wazidonsela amanzi ngomsele ngokulwa emgwaqweni nomsubathi. I-video yakhe egingqana nalo msubathi, yasabalala ezinkundleni zokuxhumana.

UButhelezi ufike kwiKZNA isimo sisibi njengoba ibhekene ngeziqu zamehlo neComrades Marathon Association (CMA) ethathe isinqumo sokuzimela.

Nokho iKZNA izama ukulungisa ubudlelwano bayo neCMA.
Phela iCMA ifaka imali ebalelwa kuR3 million ngonyaka kwiKZNA.