Siyazishwashwatha

KUPHENDULEKE imibuzo yabalandeli ngoSipho "Master Chef" Mbule (ophethe ifulegi) ebonakala ejabula ne-Orlando Pirates ngesikhathi ikhangisa ngezindebe ezintathu ezinqobe kule sizini, ohambweni lwayo lwaseGoli ngoLwesine emini.

Kuphele imidlalo yesizini edlule uMbule engasabonakali kwiBucs, okwenze walahlekelwa nayindawo kwiBafana Bafana ezodlala kwiNdebe yoMhlaba yeFifa ezoqala ngenyanga ezayo eMelika.

UMbule ubeyingxenye yabadlali abebehamba bephakamisa indebe yeMTN8, eyeCarling Knockout neyeBetway Premiership abayihlwithe kwiMamelodi Sundowns - ebisiyinqobe iminyaka ewu-8 ilandelana.

UGOODMAN Mosele ubuyela kwi-Orlando Pirates emuva kokuchitha isizini ebolekiswe kwiChippa United.

Uzojoyina uTshegofatso Mabasa (osesithombeni) ongumgadli no-Olisa Ndah oyisitobha, abebebolekiswe kwiStellenbosch FC.

I-KAIZER Chiefs ivuselele inkontileka noZitha Kwinika (osesithombeni) oyisitobha ngeminyaka emibili.

Le kilabhu yelule inkontileka yalo mdlali nje, isanda kumemezela ukuthi igqashula igoda nabaqeqeshi bayo abebebambile, uCedric Kaze waseBurundi noKhalil Ben Youssef waseTunisia.

Kuthiwa lo msebenzi kungenzeka uthathwe nguPitso "Jingles" Mosimane noManqoba "TV" Mngqithi.

I-DURBAN City isimthathe ngokugcwele uKyle Jurgens (osesithombeni), ebeyimeboleke kwiStellenbosch FC ngesizini edlule.

Le kilabhu kaFarook Kadodia imemezele nabadlali abathathu base-University of KwaZulu-Natal (UKZN) abazodlala kwiDStv Diski Challenge (DDC) ngesizini ezayo; okungu-Amukelwa Tau, uWandile Gigaba noLwandiso Yalo.

I-UKZN inobudlelwano bokusebenzisana neDurban City.

IYAHLANZA indlu kwiStellenbosch FC njengoba imemezele ukuthi iyehlukana nenqwaba yabadlali abebegijima kuyona ngesizini edlule.

Laba badlali okukhona nabebebolekiwe kubona; ngu-Oscarine Masuluke, uThabo Moloisane, u-Athenkosi Mcaba, uWayde Jooste, u-Olisa Ndah (osesithombeni), u-Aseko Tiwani, uKhomotso Lekoloane, uKobamelo Kodisang, uKazie Enyinnaya, uDejean Ah Shene, uLee Langeveldt noTshegofatso Mabasa.

IBHANTSHI ligcwale umoya kuBradley "Maphephetha" Carnell (obhunyelwa ngamanzi esithombeni) obeqeqesha iPhiladephia Union egijima kwiMajor League Soccer (MLS), e-United States of America (USA).

Le kilabhu igijinyelwa u-Olwethu Makhanya waseMbumbulu, oyingxenye yeBafana Bafana ezodlala kwiNdebe yoMhlaba yeFifa ezokuba ngenyanga ezayo e-USA, eCanada naseMexico.