Kubhekwe isiqalo sabadliwe yizembe kwiBetway Premiership

UKUDANGALA kubadlali beMagesi FC ngesizini edlule emuva kokuguqiswa yiMilford FC emidlalweni yama-play-off.

ISITHOMBE NGABE: BACKPAGEPIX

Mfanafuthi Ndlovu
 
SIBHEKWE ngabomvu isiqalo samakilabhu agencwe yizembe kwiBetway Premiership ngesizini edlule, i-Orbit College neMagesi FC njengoba kuqala imidlalo yeMotsepe Foundation Championship (MFC) ngempelasonto.

IMagesi izovakashela eThekwini iyokhiphana inkani neMidlands Wanderers esanda kusayinisa abadlali abasha.

Lo mdlalo uzokuba ngoMgqibelo ngo-15h00 eSugar Ray Xulu Stadium, eClermont.
I-Orbit izodudulana neLeicesterford City ngoMgqibelo ngo-15h00 eMafori Stadium.

Phakathi kwabadlali abasha kwiMidlands kukhona uRomario Zondo owake wayibamba kuThongathi FC olungasekho, uManelisi Radebe osuka kwiLamontville Golden Arrows noBonga Cele ongumfowabo kaMondli Cele owayegijima kwiMariztburg United.

NGABADLALI be-Orbit College ngesizini edlule beholwa ngumqeqeshi wabo, uPogiso Makhoye.

ISITHOMBE NGABE: BACKPAGEPIX

UCele ubedlala kwi-Arrows ngesizini edlule. IMagesi cishe ibuyise isikwati sayo sangesizini edlule, egencwe naso yizembe yase yenezela ngoSiphelele Magubane owake wayibamba kumaZulu FC.

Ibuye yalanda umqeqeshi omusha, uKabelo Sibiya osuka kwiHighbury FC.

IHope FC - engomakoti kwiMFC - yeboleke uSamkelo Zwane kwiKaizer Chiefs.

ICape Town City ithathe u-Abednigo Mosiatlhaga obeyibamba kwiCape Town Spurs eminyakeni edlule, noThabang Monare ophuma kwiSekhukhune United.

UMondli Mpoto obevimba kwiBaroka FC ngesizini edlule, uthathwe yiGomora United.

UBongani Makume obeyisitobha kwiBaroka FC, uqome iVenda FC elolongwa nguClinton Larsen.

Isiyonke imidlalo yokuvula isizini yeMFC imi kanjena:-
NGOLWESIHLANU
ESolomon Mahlangu: Real Natives vs Cape Town City 15h00.
EThohoyandou: Venda FC vs Lerumo Lions 15h00.
NGOMGQIBELO
E-Athlone: Hope FC vs University of Pretoria 15h00.
EMxolisi Dicky: Hungry Lions vs Gomora United 15h00.
ELucas Moripe: Leicesterford City vs Orbit College 15h00.
ESugar Ray: Midlands Wanderers vs Magesi 15h00.
E-NWU: North West University vs Upington City 15h00.
KaNyamazane: The Bees vs Highbury FC 15h00.