I-KZN engcupheni yokungamelwa kweyokulwela ukungena kwiMFC

YIZIKHULU nabadlali boMkhambathi FC, bejabula emuva kokuguqisa uMvoti FC ngo-1-0 kowokukhipha ingqwele yeKZN ABC Motsepe League, obekuwunika ithikithi lokuyomela isifundazwe kwekazwelonke, yokuhlungela ukunyukela kwiMotsepe Foundation Championship.

Mfanafuthi Ndlovu

UTHELEKA ngehlazo unobhutshuzwayo waKwaZulu-Natal esigabeni sama-amesha njengoba lesi sifundazwe singase singamelwa emidlalweni yeSafa ABC Motsepe League National Play-Offs, yokukhipha amakilabhu amabili azonyukela kwiMotsepe Foundation Championship (MFC) ngesizini ezayo.

Lokhu kudalwa ngamacala afakwa ngamakilabhu asembangweni wokuya kule midlalo ezoqala ngoMsombuluko e-Eastern Cape.

Ikilabhu eyanqoba ensimini ukuya kule midlalo, uMkhambathi FC, owehlula uMvoti FC ngo-1-0 kowokukhipha ingqwele  yalesi sifundazwe kulesi sigaba esinamaqoqo amabili. 

NGU-WELCOME Mpanza oyisikhulu soMsinga United.

Nokho uMsinga United wafaka icala lokuthi uMkhambathi ubudlalisa abadlali abangabhalisile ngokufanele, walinqoba.

NoMkhambathi ufake elifanayo ngoMsinga, bawuchitha (uMkhambathi).

UMkhambathi sewunqume ukuphonsela inselelo isinqumo sikamehluleli, sokuthi wadlalisa abadlali abangabhalisiwe ngokufanele - njengoba (ngokwesinqumo) uMvoti sekufanele ubuyele ensimini, uyobhekana noMsinga.

Kulindeleke ukuthi lolu daba luhlalelwe ngoLwesihlanu wuhlaka oluzimele lweSafa.

UKwenzakwakhe "Nsu" Ngidi omele uMkhambathi FC, uvumile ukuthi banqume ukulwedlulisa lolu daba ukuze kubuyekezwe isinqumo.

NGUKWENZAKWAKHE Ngwenya omele iSafa KwaZulu-Natal.

ISITHOMBE NGABE: BACKPAGEPIX

UKwenzakwakhe Ngwenya omele iSafa, uvumile ukuthi uyitholile incwadi ephuma kuMkhambathi FC ephonsela inselelo isinqumo sikamahluleli.

Kuthiwa abameli boMkhambathi FC bathumelele iSafa incwadi eyisivimbelo sokuqhubeka komdlalo phakathi koMvoti FC noMsinga wokukhipha ikilabhu ezomela isifundazwe kwekazwelonke.

UWelcome Mpanza ongumnikazi woMsinga, uthe yena ulinde ukwaziswa ngosuku lomdlalo wezakhe noMvoti FC, okunye akahlangani nakho.