NGU-ATHINI Maqokolo.

ISITHOMBE NGABE: BACKPAGEPIX

Mfanafuthi Ndlovu
 
UZIBEKELE umgomo wokuhlohlela AmaZulu FC amagoli angaphezulu kuka-10 kule sizini ka-2026/27 u-Athini Maqokolo ongumgadli wale kilabhu, ohlabane ngonyanyavu lweMitsubishi Outlander Sport ngoLwesithathu eThekwini, ngenxa yokuvelela kwakhe ngesizini edlule oSuthwini.

UMaqokolo odabuka eFlagstaff, e-Eastern Cape, uqobele amagoli awu-6 ngesizini edlule.

Ekhuluma neLANGA Lempelasonto,  emuva kokugixabezwa ngale moto, uthe nakanjani uzoqinisekisa ukuthi uyawufeza lo mgomo wamagoli azibekele wona.

Uthe umqeqeshi wabo, u-Arthur "10111" Zwane, ubambe elikhulu iqhaza empumelelweni yakhe.

Uthe ufana noyise kuyena ngenxa yezeluleko ezinhle amnika zona ngisho ezintweni ezithinta impilo nje jikelele.

Uthe okuningi akwenzayo enkundleni nangaphandle kwayo, kusuke kunezibusiso zakhe. Uthi ukunqoba kwakhe umklomelo wokuba ngumdlali wonyaka oSuthwini, kwenzeka ngenxa kaZwane ohlale emkhuthaza.

NGUMAQOKOLO egadulisa uPatrick Maswanganyi we-Orlando Pirates.

ISITHOMBE NGABE: BACKPAGEPIX

Ubonge noSuthu ngethuba le kilabhu emnike lona lokudlala esigabeni esikhokhelayo ekubeni eziqhamukela emakhaya.

Uthe ukholwa wukuthi ukuhlabana kwakhe ngalo mklomelo kuzogqugquzela nabanye abadlali kumaZulu FC ukusebenza kakhulu kunakuqala ejimini nasemidlalweni, ukuze bathole imivuzo yalolu hlobo.

Emdlalweni olandelayo wamaZulu FC, azovovana inkani neMamelodi Sundowns kwiBetway Premiership ngoLwesithathu ngo-19h30 eLoftus Stadium, ePitoli.

USuthu luhlabe ikhefu kule mpelasonto njengoba kugijinywa imidlalo yama-semi final yeMTN8.

Lwakhishwa yiSekhukhune United kuma-quarter final alo mqhudelwano, kuba ngu-4-3 muva nje eThekwini.