NGUKAPUTENI weRichards Bay FC uSimphiwe Mcineka.

Izimisele ngokulwela ukufinyelela kowamanqamu weNedbank Cup

Senzo Sokhela

EZIMNANDI ekhempini yeRichards Bay FC kubuya isiqongqwane somdlali wayo ebesilimele, uSimphiwe "Khimba" Mcineka ongukaputeni wayo.

IBay izobhekana neSiwelele FC emdlalweni wesigaba sikaLast 32 kwiNedbank Cup ngeSonto ngo-18h00 eDr Petrus Molemela Stadium, eBloemfontein. IBay iwuqale kabi lo nyaka uMcineka elimele. URonnie Gabriel ololonga iBay, uthi kuyabajabulisa ukubuya kwalo mdlali kwazise bafuna ukwenza kahle nakulo mqhudelwano oyisango lokuyodlala kwiCaf Confederation Cup kwizingqwele zawo.

NGUMQEQESHI weRichards Bay FC uRonnie Gabriel.

"Sike saba nenkinga enkulu emuva njengoba ukaputeni wethu uMcineka ebelimele. Useluleme ngokugcwele, ngikholwa wukuthi uzokuba yingxenye yalo mdlalo ngoba besinezinkinga emuva. Lo mdlalo uzokuba nzima, yingakho sidinga bonke abadlali bethu abawumgogodla wekilabu.

"Emqhudelwaneni weCarling Knock-out sishode kancane siphuma kuma-semi final, kulona sifuna okungenani ukufinyelela kowamanqamu. Singakwenza lokho uma sizodlala njengoba sidlala, besesenza isiqiniseko sokuthi kasiwashwebi amathuba esiwatholayo okuyiyona nkinga esisabhekene nayo," esho.