NGU-OLWETHU Mzimela ongunozinti woSuthu.

ISITHOMBE NGABE: BACKPAGEPIX

Mfanafuthi Ndlovu

IFOMU yakamuva yamaZulu FC, iqinisa idolo abanikazi bale kilabhu ngokufezeka kwephupho labo lokuyibona iqukula isicoco ngaphambi kokuhlanganisa iminyaka ewu-100 yasungulwa okuzokwenzeka ngo-2032.

Abaphathi boSuthu sebephumele kaningi obala ngokuthi bafuna nokubona le kilabhu ihamba ibanga elide emiqhudelwaneni yeCaf okungaba yikwiChampions League kumbe kwiConfederation Cup.

Kule sizini elakuleli selimelwe yi-Orlando Pirates kwiChampions League neDurban City kwiConfed Cup kuphela njengoba seyiphumile iMamelodi Sundowns neKaizer Chiefs ngokwehlukana.

USuthu lusayibambe ngakho kwiBetway Premiership njengoba lubambe isithathu kwi-log okuyindawo engalufaka kwiConfed Cup uma lungaqeda isizini lusahleli kuyona.

Umengameli woSuthu, uSandile Zungu, uthi siyamjabulisa isiqalo esihle sezakhe akholwa wukuthi zisengayisimenda indawo ezikuyona noma zenze kangcono nakakhulu.

USuthu kulindeleke ukuba luqhubeke nokuwola amaphuzu agcwele uma selubhekene nomkhaya balo iLamontville Golden Arrows koweBetway Premiership ngoMgqibelo ngo-18h00 ePrincess Magogo Stadium, KwaMashu.

NGUMANDLA Ncikazi ongumqeqeshi we-Arrows.

ISITHOMBE NGABE: BACKPAGEPIX

USuthu luya kulo mdlalo nje, lugcwele ukuzethemba kwazise selusesigabeni samaQuarter final seCarling Knockout lapho oluqhathwe khona neStellenbosch FC emdlalweni ozokuba sekuhambeni ngosuku nasenkundleni okusazomenyezelwa.

UZungu uthi basengamangaza abaningi nakuyona iCarling - ngokuyihlwitha kungalindele muntu.

U-Olwethu Mzimela ovimbela uSuthu, utshele abezindaba ukuthi umdlalo ne-Arrows umqoka kakhulu kubona njengoba befuna ukuzigcina beyizinkunzi zaKwaZulu-Natal ngaphambi kokukhonya noma bebhekene namakilabhu angaphandle kwakulesi sifundazwe.

USuthu luzodlala ne-Arrows isihlome nangomqeqeshi omusha uMandla "Mhloli" Ncikazi ofike kuyona ngeledlule esuka kwi-Orlando Pirates abeyiphini lomlolongi kuyona. Ufike nenhlanhla njengoba i-Arrows itaxe iChippa United ngo-4-0 ngeledlule koweCarling Knockout eMlazi.

"Sizimisele ngokufela enkundleni kulo mdlalo ukuze siwaqoqe wonke amaphuzu ikakhukulazi njengoba kuzokube kuyithina esidlalela ekhaya,"
kusho uMzimela.

Kungenwa ngo-R60 kulo mdlalo, kanti amathikithi ayatholakala ezikhungweni eziwadayisayo.