Kunconywa isibindi kumqeqeshi weChiefs

NGUMQEQESHI weChiefs, uFernando Da Cruz ekhombisa ukunganeliseki ngesinqumo sikanondweba. 

ISITHOMBE NGABE: BACKPAGEPIX

Senzo Sokhela
 
U-ASANELE Velebayi (23), odlala esiswini kwiKaizer Chiefs, uchaza ngasekubone kuFernando Da Cruz ongumqeqeshi omusha wale kilabhu ezobhekana neRichards Bay FC koweBetway Premiership ngoLwesithathu ngo-19h30 ePrincess Magogo Stadium, KwaMashu.

IChiefs imemezele uDa Cruz njengomqeqeshi wayo omusha ekuqaleni kwale sizini. Ungene endaweni kaCedric Kaze noKhalil Ben Youssef abebebanjiswe ukulolonga iChiefs isizini edlule - emuva kokukhonjwa indlela kukaNasredine Nabi.

UDa Cruz selokhu efikile, ubukeka eza kahle njengoba iChiefs ibalwa namakilabhu asembangweni wesicoco seligi zibekwa nje ebhandeni.

NGU-ASANELE Velebayi. 

UVelebayi - ofike maphakathi nesizini edlule eNaturena - uchaza lo mqeqeshi njengendoda enesibindi esesabekayo.

"Esengikuqaphele ngalo mqeqeshi wukuthi ungumuntu onesibindi esesabekayo, enjalo nje ufuna kwenzeke izinto ngendlela yakhe, akayifuni into ebheke eceleni.

"Buka nje, ufike iChiefs inengcindezi kudingeka imiphumela, kodwa yena unika ithuba abadlali abasebancane, njengami, uBaartman noMfundo Vilakazi ukuba bamenzele umsebenzi.

"Phela wukuba nesibindi ukujikijela ensimini abantu abangenaso isipiliyoni, ubathwese umsebenzi onzima kangaka.

"Ngiyamuncoma ngalokho, futhi kangingabazi ukuthi ngokuhamba kwesikhathi iChiefs izobuyela esimweni, ibuyise nesithunzi sayo," kusho uVelebayi.

Imidlalo yeBetway Premiership ezokuba phakathi nesonto imi kanjena:-
NGOLWESIBILI
ERoyal Bafokeng: Marumo Gallants vs TS Galaxy 19h30.
E-Orlando Amstel Arena: Orlando Pirates vs Sekhukhune 19h30.
EMbombela: Kruger United vs Durban City 19h30.
EToyota: Siwelele vs Chippa United 19h30.
NGOLWESITHATHU
ESeshego: Polokwane City vs Milford 19h30.
ELoftus: Mamelodi Sundowns vs AmaZulu 19h30.
EPrincess Magogo: Richards Bay FC vs Kaizer Chiefs 19h30.
EKing Zwelithini: Golden Arrows vs Stellenbosch 19h30.