KWESOBUNXELE; ngumqeqeshi wePirates, u-Abdeslam Ouaddou, enomlolongi weChiefs, uFernando da Cruz. 

ISITHOMBE NGABE: BACKPAGEPIX

Mfanafuthi Ndlovu
 
KUNINGI okumisa isibindi uFernando da Cruz ongumqeqeshi weKaizer Chiefs ukuthi ezakhe zingakwazi ukuqumba phansi i-Orlando Pirates koweBetway Premiership ngoMgqibelo ngo-15h30 eFNB Stadium, eSoweto.

UDa Cruz utshele abezindaba ukuthi umphumela abawuthole ngoLwesibili ebusuku kule nkundla, bebhudluza iTS Galaxy ngo-3-0 - okubafake kuma-quarter final eCarling Knockout - ukholwa wukuthi ubuyise ukuzethemba kubadlali bakhe, okuzokwenza baye emdlalweni weBucs benomdlandla ophindiwe uma bengena enkundleni.

Uthe kubalulekile ukuthi baqinise nasekugcineni imiqondo yabadlali isesimweni esihle ngoba lo mdlalo ungomkhulukazi eNingizimu Afrika.

Uthe bazoya kulo mdlalo beqaphe ngelokhozi, ngoba iPirates iyingozi enkulu. Uthe okubalulekile okufanele bakwenze, wukuphaselana kahle ibhola, bangalilahli kalula ezitheni.

KWESOBUNXELE; ngumqeqeshi weChiefs, uFernando da Cruz enesekela lakhe, uMahmoud Abbas.

ISITHOMBE NGABE: BACKPAGEPIX

Uthe leli yithuba labadlali lokuzibonakalisa ukuthi yini abakwazi ukuyenza uma benikwa ithuba lokudlala.

"Indlela adayiswe ngokushesha ngakhona amathikithi alo mdlalo (athengwe ngaphansi kwamahora awu-6) yiyona ekhombisayo ukuthi abalandeli bawulangazelele kangakani lo mdlalo, futhi kucacisa nokuthi umqoka kangakanani kubathandi bakanobhutshuzwayo baseNingizimu Afrika.

"Lo mdlalo siwulungele ngazo zonke izindlela. Ngiyazi ukuthi ikhona ingcindezi kubadlali, kepha kumqoka ukuba silokhu sibakhumbuza ukuthi konke kungenzeka uma bezogxilisa imiqondo yabo kuwona ngosuku lomdlalo.

Nginesiqiniseko sokuthi iPirates igabe nangesipiliyoni sabadlali enabo njengoba iningi labo ligijima ngisho nakwiBafana Bafana.

"Nokho ngiyabethemba abadlali bami ukuthi bazokwazi ukumelana nanoma ngabe yisiphi isimo. Kubalulekile ukuthi sidlale kahle, ibhola lethu kufanele ligculise nabalandeli abazofika ngezinkani enkundleni," esho.

UBertie Grobbelaar obemele abanikazi beFNB Stadium unxuse abalandeli abangenawo amathikithi ukuba bangalinge bazixake ngokuya kulo mdlalo, kwazise ezokuphepha zizokube ziqine kakhulu ngaphandle nangaphakathi enkundleni.