'IPirates kufanele ibhukule ukuvikela iligi'

Senzo Sokhela

UPHAWULA ngesicoco seligi abasempini yokusivikela umqeqeshi we-Orlando Pirates, u-Abdeslam Ouaddou.

IBucs iphoxe abalandeli bayo ilahla amaphuzu amqoka ibambana namaZulu FC ngo-1-1 koweBetway Premiership ngoLwesithathu ebusuku eHollywoodbets Kings Park Stadium, eThekwini.

Igoli leBucs lishaywe nguTshepang Moremi, kwathi eloSuthu labhakuziswa nguThandolwenkosi Ngwenya, obekuyiphenathi.

NGUMLONDI Mbanjwa wamaZulu FC ewa ebhokisini leBucs, exinwe nguKamogelo Sebelebele.

ISITHOMBE NGABE: BACKPAGEPIX

U-Ouaddou uthi kuzofanele bashintshe ukwenza uma bezimisele ngokuvikela isicoco seligi.

"Ngiyayithanda ikilabhu yami, kodwa iqiniso kufanele ngilikhulume. Lo mdlalo bekufanele siqede ngawo uma ubheka amathuba esiwakhile ngesiwombe sesibili.

"Kangifuni nokuyikhuluma eyesiwombe sokuqala, sona ngisifanisa nenhlekelele ngendlela esishwebe ngayo amathuba abezokwenza sisheshe siwugoqe umdlalo.

"Kulo mdlalo besibuthuntu phambi kwamapali. Uma sifuna ukuvikela isicoco, kuzofanele sishintshe ukwenza. Kuzofanele sikwenze lokho emdlalweni wethu olandelayo neChippa United.

"Kasikwazi ukuphinda silahle amaphuzu nakulo mdlalo (weChippa), kufanele senze isiqiniseko sokuthi sibuya nawo ephelele.

"Nawo lo mdlalo weChippa ngeke ubelula, kodwa uma sizovalela amathuba esiwakhayo, kangingabazi ukuthi singawunqoba ngamagoli amaningana," kusho u-Ouaddou.

Umdlalo weBucs neChippa uzokuba ngeSonto ngo-15h00, khona eKings Park Stadium.