UKHULISO Mudau weDowns evinjwa nguYanga Madiba weGallants.

ISITHOMBE NGABE: BACKPAGEPIX

Senzo Sokhela
 
IJIKE yaba muncu injabulo kaMiguel Cardoso ongumqeqeshi weMamelodi Sundowns, njengoba elinyalelwe nguKhuliso Mudau ongumdlali omqoka, okuvela ukuthi angase ahlale isikhathi eside engabonakali enkundleni.

IDowns izobhekana neLamontville Golden Arrows emlenzeni wokuqala weSemi final yeMTN8 ngeSonto ngo-15h00 eLucas Moripe Stadium, e-Atteridgeville.

IDowns iya kulo mdlalo nje, iguqise iMarumo Gallants ngo-2-0 koweBetway Premiership ngoLwesithathu ebusuku eLoftus Stadium, ePitoli. Inqobe ngamagoli avalelwe enethini nguMalibongwe Khoza noCassius Mailula.

Lo mdlalo uphele kumuncu ekhempini yeDowns kulimala uMudau oyisitobha. Kuvela ukuthi ulimale umsipha ophakathi kwesithende nesihluzu.

UKHISHWE ngohlaka sekumuncu uMudau.

ISITHOMBE NGABE: BACKPAGEPIX

Ngokuvamile, lokhu kulimala umdlali kumhlalisa izinyanga eziwu-6 kuya kweziwu-8 engadlali, kuya nangokuthi ulimale kanzima kanjani.

Injabulo kaCardoso yokunqoba lo mdlalo weGallants ijike yaba muncu ngenxa yokulimala kukaMudau ophume kulo mdlalo esehamba ngezinduku.

"Ngebhadi ngeke sibe naye kulo mdlalo wangempelasonto nakweminye nje ezayo ngoba ulimale kanzima.

Kasilahlekelwe sodwa, kodwa neNingizimu Afrika ngokunjalo ilahlekelwe (njengoba eyinsika nakwiBafana Bafana). Ukulimala ukuthole ezihambela yedwa, akalinyazwanga muntu.

"Sishayekile, sesizolinda sizwe ukuthi uzohlala isikhathi esingakanani engadlali kodwa khona kubukeka kukubi impela.

"Kodwa-ke yithuba kwabanye lokuthi bazibonakalise, basivale isikhala sakhe," kusho uCardoso.