Siyazishwashwatha

IBAFANA Bafana izokuba nomdlalo omqoka eThekwini ezowugijima nePanama ukuvivela iNdebe yoMhlaba yeFifa ezoqala ngomhla ka-11 kuJune, isongwe ngomhla ka-19 kuJuly e-United States of America (USA), eCanada naseMexico ngokuhlanganyela.

Umdlalo weBafana nePanama uzokuba ngoLwesihlanu lomhla ka-27 kuMarch eMoses Mabhida Stadium.

Owesibili weBafana nePanama uzokuba ngoLwesibili eDHL Cape Town Stadium.

 Kulindelwe ukuba lo mdlalo uhanjelwe yizinkumbi zabalandeli ukuyofisela iBafana indlela enhle.

Amathikithi okubuka le midlalo ngokwahlukana, abiza u-R80 awabadala no-R50 awezingane.

AMAZULU FC akholwa wukuthi kuzowasebenzela ukuphonsa iCasric Stars enkundleni engayazi, njengoba ezogijima nayo kwiQuarter Final yeNedbank Cup ezokuba ngoMgqibelo womhla ka-7 kuMarch ngo-15h00 eMoses Mabhida Stadium, eThekwini.

ICasric izokube iqala ngqa ukudlala kulo dedangendlale wenkundla osetshenziswa wuSuthu emidlalweni yalo yasekhaya.

UPhilani "Pro" Ndlela (osesithombeni), ongumxhumanisi woSuthu, uthi njengoba kucaca ukuthi asemancane amathuba abo okulwela ngempumelelo isicoco seligi, ukunqoba iNedbank yikhona osekuzobafaka emidlalweni yase-Afrika ngesizini ezayo njengoba lo mqhudelwano uyisango lokuya kwiCaf Confederation Cup.

Ozonqoba iligi nozoqeda eyisibili bazomela iNingizimu Afrika kwiCaf Champions League.

I-DURBAN City igqashule igoda no-Ernst Middendorp (osesithombeni) obengusomaqhinga wayo.

Ikwenze lokhu ngokungayivuseleli inkontileka nalo mqeqeshi odabuka eGermany.
Bebenesivumelwano sezinyanga ezintathu.

Lokhu kuqinisekiswe nguFarook "Ntshebe" Kadodia ongumnikazi weCity ezodlala neGolden Arrows kwiQuarter final yeNedbank Cup ngeSonto lomhla ka-8 kuMarch ngo-18h00 eMlazi.
Isiyonke imidlalo yamaQuarter final yeNedbank Cup imi kanjena:
NGOMGQIBELO mhla ka-7 kuMarch
EMoses Mabhida: AmaZulu FC vs Casric Stars 15h00.
ENew Peter Mokaba: Sekhukhune United vs Milford FC 18h00.
NGESONTO mhla ka-8
ESolomon Mahlangu: TS Galaxy vs Jacksa Spears 15h00.
EKing Zwelithini: Golden Arrows vs Durban City 18h00.