UBroos ucacisa ngabadlali abagabhe kwiBafana

NGUTHAPELO Morena (okwesobunxele) enozakwabo kwiMamelodi Sundowns, uGrant Kekana.

ISITHOMBE NGABE: BACKPAGEPIX

Mfanafuthi Ndlovu

UCACISA ngezizathu zokushiya ngaphandle abadlali abebethishwa ukuhamba neBafana Bafana ukuya kwiNdebe yoMhlaba yeFifa uHugo Broos ongumqeqeshi walesi sikwati sikanobhutshuzwayo saseNingizimu Afrika.

UBroos, ngoLwesithathu ebusuku, umemezele abadlali abawu-26 azogadla ngabo kule midlalo ezoqala ngomhla ka-11 isongwe mhla ka-19 eCanada, eMexico naseMelika ngokuhlanganyela.

Ushiye ngaphandle uBrandon Petersen ovimbela iKaizer Chiefs - okusongwe isizini esefomini - noThapelo Morena olihlikihla kwiMamelodi Sundowns.

Uthe ubemanqika ukuhamba noPetersen ngoba akamazi ukuthi uziphatha kanjani uma eqiwa yijezi, kungafani noRicardo Goss aseke wasebenza naye phambilini.

NGU-BRANDON Petersen ongunozinti weChiefs.

ISITHOMBE NGABE: BACKPAGEPIX

Unozinti wokuqala weBafana, uRonwen Williams ongukaputeni, kanti uma engekho kuvimba uSipho Chaine we-Orlando Pirates osanda kuqopha umlando engangenelwa ngamagoli emidlalweni ewu-21 yeBetway Premiership kule sizini esanda kusongwa, ka-2025/26.

"Ukulimala kukaPetersen kwenza kangaze ngalithola ithuba elikahle lokumbona ekhempini, kanti uMorena besibambe umoya ngokulimala kwakhe njengoba bekufanele sizwe kodokotela ngesimo sakhe sakamuva," esho.

Uthe ukhulumile nabadlali abasale ngaphandle emuva kokuba esememezele azohamba nabo.

Uthe okwenze waphuza ukumemezela iqembu lokugcina, wukuthi ubefuna iSundowns nePirates baqede imidlalo yabo njengoba abadlali bala makilabhu bewumgogodla weBafana.

UBroos uthe ukuqonda kahle nokuthi ngeke kugculiseke bonke abantu uma ememezela iqembu lakhe.

"Into emqoka njengamanje, ngamalungiselelo okufanele siwenze njengoba siya kule midlalo emikhulu kangaka," esho.

Iqembu labadlali abawu-26 beBafana Bafana eliya emqhudelwaneni weNdebe yoMhlaba yeFifa selilonke limi kanje:
Onozinti: URonwen Williams [Mamelodi Sundowns], uRicardo Goss [Siwelele FC] noSipho Chaine [Orlando Pirates].
Abasemuva: UKhuliso Mudau [Mamelodi Sundowns], uNkosinathi Sibisi [Orlando Pirates], uKhulumani Ndamane [Mamelodi Sundowns], u-Ime Okon [Hannover 96], u-Aubrey Modiba [Mamelodi Sundowns], uSamukele Kabini [Molde FK], uThabang Matuludi [Polokwane City], u-Olwethu Makhanya [Philadelphia Union], uKamogelo Sebelebele [Orlando Pirates], uBradley Cross [Kaizer Chiefs] noMbekezeli Mbokazi [Chicago Fire].
Abasesiswini: UTeboho Mokoena [Mamelodi Sundowns], uJayden Adams [Mamelodi Sundowns], uThalente Mbatha [Orlando Pirates] noSphephelo Sithole [CD Tondela].
Abaphambili: U-Oswin Appollis [Orlando Pirates], u-Iqraam Rayners [Mamelodi Sundowns], uTshepang Moremi [Orlando Pirates], uRelebohile Mofokeng [Orlando Pirates], u-Evidence Makgopa [Orlando Pirates], uThemba Zwane [Mamelodi Sundowns], uLyle Foster [Burnley FC] noThapelo Maseko [AEL Limassol].