I-Hollywoodbets Sharks evikela isicoco seCarling Currie Cup izovula ngeLions ekuhambeni.

Nhlanhla Hudla

IKHUZA ibuya imidlalo yeCarling Black Label Currie Cup ngale mpelasonto njengoba iHollywoodbets Sharks XV izovula neFidelity ADT Lions eyayehlula kowamanqamu ngemizuzu yokugcina ngesizini edlule.

Umdlalo walawa maqembu uzokuba ngoMgqibelo ngo-15h00 e-Ellis Park, eGoli.

Le midlalo izodlalwa ngabanye babadlali abadedelwe nguRassie Erasmus, ongumqeqeshi weqembu lesizwe laseNingizimu Afrika, AmaBhokobhoko, azodlala imidlalo yeRugby Championship ne-Australia, i-Argentina ne-All Blacks yaseNew Zealand.

ISharks izokube iqeqeshwa nguJP Peterson kulo mqhudelwano.

UKerryn Greenleaf oyisikhulu esiphezulu kwaBlack Label, okungabaxhasi beCurrie Cup, uthi bazoqhubeka nokuxhasa lo mqhudelwano osukhiqize inqwaba yabadlali abanohlonze kuleli.

Uthi inhloso yabo wukwelekelela iqembu lesizwe ukuba liqhubeke nokuphakamisa ifulegi lakuleli emidlalweni yomhlaba.

* Isiyonke imidlalo yeCurrie Cup imi kanje:-
NGOLWESIHLANU
Airlink Pumas vs Suzuki Griquas 19h00.
NGOMGQIBELO
Fidelity ADT Lions vs Hollywoodbets Sharks XV 15h00.
DHL Western Province vs Vodacom Bulls 17h10.
NGESONTO
Boland Cavaliers vs Toyota Cheetahs XV 15h00.