Kubhekwe isinqumo seChiefs ngabaphelelwa yizinkontileka

Senzo Sokhela

SIBHEKWE ngabomvu isinqumo seKaizer Chiefs ngabadlali bayo abaphelelwa yizinkontileka nale kilabhu.

IChiefs yenze kangcono ngesizini edlule iqeda ilele endaweni yesithathu kwi-log yeBetway Premiership.

Njengoba iqede endaweni yesithathu nje, izodlala emqhudelwaneni weCaf Confederation Cup ngesizini ezayo.

Le kilabhu iqede ukuqagela ngekusasa labaqeqeshi abebebambile kuyona, uKhalil Ben Youssef noCedrci Kaze, obekungacaci noma bazoqhubeka yini, kumbe bazohamba njengoba benze kahle.

Isheshe yabakhomba indlela njengoba kulindeleke ukuba imemezele umqeqeshi omusha.

NGUSIBONGISENI Mthethwa (okwesobunxele) 'ogxavaza' uSbani Mntungwa weRichards Bay FC, ongomunye wabadlali abaphelelwa yizinkontileka kwiziMpofana.

ISITHOMBE NGABE: BACKPAGEPIX

Osekubhekwe ngabalandeli bayo manje, wukuthi izomisa kanjani ngabadlali bayo abaphelelwa yizinkontileka.

Phakathi kwabadlali abaphelelwa yizinkontileka kubalwa uNkosingiphile Ngcobo, uDillan Solomons, uPule Mmodi, uSibongiseni Mthethwa, uBruce Bvuma, uTashreeq Morris, uGaston Sirino noBrandon Petersen.

Abalandeli bale kilabhu balindile, bafuna ukubona ukuthi kuzokwenzekani ngalaba badlali. Kukhona abafuna zivuselelwe izinkontileka, kanti bakhona nabathi mabahambe.

UVina Maphosa wezokuxhumana kwiChiefs, uthi ikilabhu izokwenza isimemezelo uma kukhona okwenzekayo.