IChiefs empini yokulwela izindebe

Kulindeleke nesinedolo koweziMpofana neZesco eThekwini

NGULEBOHANG Maboe odlala esiswini kwiKaizer Chiefs.
IZITHOMBE NGABE: BACKPAGEPIX

Senzo Sokhela

WENZA isethembiso kubalandeli beKaizer Chiefs ngezinkomishi ezisasele uLebohang Maboe (31) ongumdlali wale kilabhu okhombisa ukuba sefomini muva nje.

IChiefs inyukele endaweni yesibili kwi-log yeBetway Premiership iguqisa iMarumo Gallants ngo-1-0 ngoLwesithathu ebusuku eDr Petrus Molemela Stadium, eBloemfontein. Igoli leChiefs libhakuziswe enethini nguGlody Lilepo.

Ifomu yakamuva yeChiefs njengoba ishaya kwasani ephambi kwayo, ibuyise ithemba kubalandeli bayo abake baphenduka inhlekisa iminyaka ewu-10 inganqobi lutho.

NGULEBOHANG Maboe weChiefs ezama ukuphambanisa nebhola uMonde Mphambaniso weMarumo Gallants.

Kulindeleke ukuba kuphume nesinedolo njengoba iza lapha KwaZulu-Natal ukuzobhekana neZESCO United yaseZambia emlenzeni wesibili ka-group D kwiCaf Confederation Cup ozokuba ngeSonto ngo-15h00 eMoses Mabhida Stadium, eThekwini.
Emzuliswaneni wokuqala iChiefs inqobe ngo-1-0 ekuhambeni ngeledlule.

UMaboe - odlala esiswini kwiChiefs - oqokwe njengomdlali ovelele emdlalweni weMarumo, uthembisa abalandeli beziMpofana izinkomishi ezisabasalele kule sizini.

NGUGLODY Lilepo oshaye inkunzimalanga yegoli, bedla iMarumo Gallants ngo-1-0 koweligi.

"Sithwele ibheji elisindayo. Kuyinto enkulu kabi ukuba yingxenye yale kilabhu enomlando ongaka. Inhloso yethu wukuthi sishiye ijezi lale kilabhu lisesimweni esihle kunalesi esilifice liyiso. Engifuna ukukwethembisa abalandeli bethu wukuthi sizolokhu siqhubeke njalo nokulwela izinkomishi. Zintathu izinkomishi ezisasisalele ngale sizini, noma kanjani sizoya mawala ukuzama ukuzinqoba," kusho uMaboe.

IChiefs isalelwe yiBetway Premiership, yiNedbank Cup neCaf Confederation Cup.

KUBHEKWE ushube kakhulu umbango kuKhuliso Mudau weSundowns noJean Girumugisha we-Al Hilal njengoba emlenzeni wokuqala weCaf Champions League, umdlalo waphela zibambene ngo-2-2.

* IMamelodi Sundowns izodlala ne-Al Hilal yaseSudan emlenzeni wesibili weCaf Champions League ngoLwesihlanu ngo-21h00. Lo mdlalo uzogijinyelwa eRwanda ngenxa yezinkinga zodlame eSudan. Emlenzeni wokuqala la makilabhu abambane ngo-2-2 eLoftus Stadium, ePitoli ngeledlule.

* IStellenbosch FC izobhekana neCR Belouizdad yase-Algeria emlenzeni wesibili ka-group C ngeSonto 15h00 eDHL Cape Town Stadium. Emlenzeni wokuqala obuse-Algeria ngeledlule iStellies iguqe ngo-2-0.