Amanqampunqampu

UPITSO "Jingles" Mosimane ongumqeqeshi weBafana Bafana, umemezele isikwati sakhe sokuqala sabadlali abawu-30 azogadla ngabo emidlalweni yokuhlungela i-Africa Cup of Nations (Afcon) ezogijinywa ngonyaka ozayo eTanzania, e-Uganda naseKenya ngokuhlanganyela.

Lesi sikwati sizodlala owokuhlungela i-Afcon neGuinea ngomhla ka-26 kwephezulu e-Orlando Amstel Arena, eSoweto. Sizobhekana ne-Eritrea mhla ka-30 kuSeptember, e-Egypt.
Sizobe sesilandela ngowesihle ne-Egypt ngomhla ka-4 ku-October eCairo.

Iqembu leBafana selilonke limi kanje;
Onozinti: 
URonwen Williams, uSipho Chaine noRicardo Goss.
Abasemuva: 
U-Aubrey Modiba, uSamukele Kabini, uFawaaz Basadien, uKamogelo Sebelebele, uThapelo Morena, uThabang Matuludi, u-Olwethu Makhanya, uKhulumani Ndamane, u-Ime Okon, uLebone Seema noNkosinathi Sibisi.
Abasesiswini:
UTeboho Mokoena, uLebogang Maboe, uSphephelo Sithole, uBathusi Aubaas noBrooklyn Poggenpoel.
Abaphambili:
U-Iqraam Rayners, uYanela Mbuthuma, uCassius Mailula, u-Oswin Appollis, uPuso Dithejane, uTashreeq Matthews, uRelebohile Mofokeng, uThemba Zwane, uThapelo Maseko, uLuther Singh noShandre Campbell.

SIBONA ikusasa eliqhakazile isikhulu samaZulu FC ngesivumelwano esisayinwe yile kilabhu neLevante FC yaseSpain, sokusebenzisana emazingeni aphansi.

USandile Zungu (osesithombeni), ongumphathi woSuthu, utshele abezindaba ukuthi lesi sivumelwano ukholwa wukuthi sizohamba ibanga elide ekudlondlobaliseni la makilabhu.

Uthe lolu bumbano luzofukula injejane yala makilabhu.
"Kusho lukhulu kithina siyikilabhu. Kangingabazi ukuthi lokhu kuzokuba nomthelela omuhle ekilabhini, kuzovulela amathuba abadlali bethu abasebancane okuvelela.

"Abadlali bethu bazothola ithuba lokuhlinzekwa ngoqeqesho lwezinga eliphezulu. Ngikholwa wukuthi baningi abadlali abasebancane abazofuna ukuba yingxenye yekilabhu ngenxa yalesi sivumelwano.

"Kuningi esizokuzuza siyikilabhu njengoba nabaqeqeshi bethu, kanjalo nezikhulu bezothola ingqayizivele yethuba lokuyocobelela ulwazi naphesheya kwezilwandle, kule kilabhu yaseSpain.

"Sibona kuzovuleka ithuba elihle kubadlali abasebancane. Ngamanye amazwi, ngokudayiselana ngabadlali ikilabhu izokwazi ukuzuza," esho.

UMarcos Maisano oyisikhulu esiphezulu kwi-ISAM360, oyinkampani ehlanganise lesi sivumelwano ukuze intsha izuze okuningi, uthe lokhu kuzokwenza ukuba zonke izinhlangothi zizuze.

UDaniel Pastor obemele iLevante FC, ehambisana no-Alejandro Losa, uncome umlando woSuthu. Uthe ukholwa wukuthi bazogcina bekwazile nokuhlela umdlalo wobungani neqembu elikhulu lale kilabhu yaseSpain.

Uthe okwamanje bazogxilisa imiqondo ekufukuleni intsha, bahambele sonke isifundazwe ukuze kuphume ukhilimu ozongena khaxa esitayeleni saseSpain.

UFAKE incwadi yokwesula isigubhukane uRonnie Gabriel (osesithombeni) obengumqeqeshi weRichards Bay FC, esazikhotha amanxeba ngokumuhluzwa yiMilford FC ngo-5-1 koweBetway Premiership ngeledlule eSugar Ray Xulu Stadium, eClermont.

IBay FC ithumelele abezindaba isitatimende izolo ngoLwesine ebesicacisa ukuthi seyihlukene noGabriel.

Kuthiwa baningi abaqeqeshi abagaqele umsebenzi weBay, okukhona kubona uBegnovic owake wayibamba kwiTS Galaxy, uPhuthi Mehafe obecija iMarumo Gallants ukukha nje phezulu.

Kuthiwa okuqhathe uGabriel nezikhulu zeBay FC, wumphumela wangeledlule njengoba le kilabhu iphendulwe inhlekisa ngomakoti beBetway Premiership.

Emdlalweni olandelayo iBay izoshukana neSekhukhune United koweBetway Premiership ngoMgqibelo ngo-15h00 ePrincess Magogo Stadium, KwaMashu.

Ebhentshini leBay FC kuzokube kuhleli uS'boniso "Jomo" Gumede - obeyiphini likaGabriel - noSbusiso Msomi, opheka iqembu lale kilabhu elidlala kwiDDC yale kilabhu.