Ukuthuthuka kwezobuchwepheshe kuza nengcindezi kwezokuthutha

Ukunyuka kukaphethiloli nomthelela wakho embonini ngenye yezihloko ezidingidwe kabanzi...

IZISOMBULULO ezilethwa wubuchwepheshe kwezokuthutha, zibonakala ziyifaka ingcindezi embonini ikakhulukazi emkhiqizweni ongasazidingi izandla eziningi (automation).

I-Naamsa SA Auto Week ka-2026 evule ngoLwesibili, eDurban International Convention Centre, ibihanjelwe yiziphathimandla zokubuswa kwamazwe, yizikhulu zemboni yezokuthutha, abakhiqizi bezimoto, nemikhakha ebambe iqhaza kwezokuthutha, ibisingethwe ngokubambisana nohulumeni waKwaZulu-Natal, uMnyango kaZwelonke WezoHwebo, Izimboni nokuNcintisana.

Izingxoxo zithinte zonke izinhlaka ezibhekene nokuthuthukiswa kwemboni nemikhakha ebambe iqhaza nedlala indima emqoka ekuthuthukisweni kwezokuthutha, ikakhulukazi imboni nemikhiqizo yayo.

Enkulumweni ebibungaza iminyaka emihlanu ye-Auto Week ebiphakathi kwezikhulu ezahlukene, okubalwa kuzo uMfundisi Musa Zondi ongungqongqoshe wezokuThuthukiswa koMnotho,eEzokuVakasha 
nezeMvelo KwaZulu-Natal, uNkz Junior Shabangu ongumphathi nomxhumanisi nokubambisana
kwaWesbank, uMnu Msokoli Ntombana isikhulu esiphezulu sakwaTASEZ, uNkz Elmien Sambandan oyisazi ekuguqulweni kwemboni ukuze abasafufusa bathole amathuba no-Charl Potgieter ongumqondisi omkhulu kwa-Absa, baqhakambise ukuthi eminyakeni ezayo emihlanu, kuyophoqeleka ukuba ingqungquthela ibungaze ngokuveza ukusimamiswa kosomabhizinisi abamnyama ngo-25%, ngoba lokhu kusayiphupho embonini.

Le nkulumo yelame inkulumo eyethulwe nguMnu Irvin Jim ongunobhala jikelele weNUMSA ebiyingxenye yezinkulumo zongqongqoshe abehlukene.

UJim ukhale kakhulu ngokuhudula izinyawo kukahulumeni ekuvalweni kwemboni yezimoto nemikhiqizo nokuvumela ukungena kwemikhiqizo yangaphandle kwakuleli, osekudale ukuphela kwemisebenzi yabaningi kuleli.

Uphinde wakhala ngokuthi imikhiqizo evela ngaphandle isezingeni eliphansi okubeka abathengi engcupheni. Unxuse ukuba inyuswe inhlawulo nentela emikhiqizweni yakwamanye amazwe. Uthe lokhu kuzogqugquzela ukuthengwa kwemikhiqizo yakuleli ukuze kusimame osomabhizinisi abancane, kuvikelwe imisebenzi nezimboni ezizinze eMpumalanga Kapa naKwaZulu-Natal.

Nakuba inkulumo ngobuchwepheshe obudlondlobalayo nokungenisa kwezimoto zikagesi ibiseqhulwini, isikhalo ngezidingo-ngqangi ezingekho esimweni, ezifana nemigwaqo engalungiswe kabusha, yichweba elingaphephile nokuntuleka kwezindawo zokushaja lolu hlobo lwezimoto, besisho phezulu.

Ukunyuka kukaphethiloli nomthelela wakho embonini ngenye yezihloko ezidingidwe kabanzi. Kanti ngaphandle nje kweziphathimandla nezingcithabutho, abasezifazane nentsha ngabanye ebebevulelwe amathuba kule ngqungquthela.

AmaTVET, abafundi nezikhungo eziqeqesha ngezobuchwepheshe, ubunjiniyela nokusebenza
kwe-robhothi babe nezingxoxo nongoti abahlukene.

Abaholi bakuleli abebengezinye zezikhulumi  kulo mcimbi ovale ngoLwesihlanu mhla ka-16 ku-October, nguNdunankulu waKwaZulu-Natal, uMnu Thami Ntuli, yiMeya yeTheku, uMnu Cyril Xaba, uNgqongqoshe kaZwelonke wezoHwebo iziMboni nokuNcintisana, uMnu Parks Tau nokhulumele ihhovisi likamengameli wakuleli, ngosuku lokuqala.