Bayayishalazela abathengi imoto eshibhile

 Ziyinyama emaseleni izimoto ezinamandla njengeFord Raptor, nezinye ezisezingeni layo ngenxa yamandla azo.

BAPHELELWA yithemba abathengi bezimoto ngomnotho ontengantengayo namanani aphezulu ezimoto nezindleko ezihambisana nayo.

Nakuba izimoto ezintsha zithembisa abathengi ukonga nokuphepha, akupheli ukukhathezeka kwabathengi ngezindleko zokuba nemoto, uphethiloli obizayo nomshwalense.

Ngenxa yesimo semisebenzi ekude nezidingo zabashayeli zansukuzonke, ukuba nemoto sekwaba yisidingo-ngqangi kwabaningi. Kanti nakuba kunjalo, uma uqhathanisa izidingo zakho, inani lazo nemali oyiholayo noma oyenzayo, kunomehluko omkhulu.

 Isimo somnotho esintengantengayo senza kube nzima kubathengi ukuthatha izinqumo eziphusile, nezizokwenza baphefumule kangcono ngokwephakethe.

Lokhu kwenza kube nzima kubathengi ukuthatha izinqumo eziphusile nezizokwenza baphefumule kangcono ngokwephakethe.

Inkulumo yangonyaka odlule yoMphathi Omkhulu (CEO) wakwa-AutoTrader, yaveza ukuthi abathengi bezimoto eMzansi sebeyibheka ngenye indlela indaba yokuba nemoto, ikakhulukazi lapho bezothenga khona imoto entsha.

“Okuhamba phambili akusikho nje ukubiza kwemoto, kodwa yizindleko ezihambisana naleyo moto ngenxa yomnotho ongazinzile”, ekusho lokhu kwabeNewzroom Afrika.

Uthi lokhu sekwenze abantu basebenzisa amasu amasha ngezimoto, afana nokuthenga imoto esike yahamba phambilini (pre-owned), ukurenta imoto isikhathi esithile ukugwema izindleko zokuyikhipha egalaji ngesikweletu esingunaphakade (car subscription).

Ake sibheke imibuzo nezinto ezihlupha abathengi bezimoto...

Ihamba phambili eyokuphepha nokuba yisisulu sezigebengu eMzansi
(high risk): 
Lolu wuhlobo lwezimoto ezifunwa yizelelezi zezimoto ngenxa yokwakheka kwazo nama-parts azo; izimoto ozithola phambili ohlwini ngezifana noToyota Hilux, Ford Ranger, Volkswagen Polo, Nissan NP200 nama-Toyota Fortuner.

Lezi zimoto ziyinyama, ikakhulukazi emazweni akake iNingizimu Afrika ngenxa yokuthembeka kwazo emgwaqweni, namandla azo obhuqwini nangaphandle kwetiyela.

Ama-parts azo adayiseka kalula, ngakho ngamanani aphezulu kubalulekile ukukwazi lokhu ngaphambi kokuthenga imoto ukuze ungabeki impilo yakho engcupheni.

Okunye okubhekwa ngabathengi bezimoto wukuphepha kwemoto: kanti abashayeli bakholelwa wukuthi izimoto ezishibhe kakhulu nezithathwa njengezabashayeli abasafika emgwaqweni (entry level), aziphephile.

Lezi zimoto abazithandi abashayeli ngenxa yokuthi azinazo izinsiza kuphepha ezitholakala kwezinye izimoto. Lezi zinhlaka-zokuphepha ngezifana
nama-airbags, amabhuleki e-ABS, kanti imoto eba sengozini ingabe isakulungela ukuba semgwaqweni ngenxa yokungalungiseki, bayishaya indiva.

Ezinye zalezi zimoto ngo-Renault Kwid, Kia Picanto, Datsun Go  nezimoto esezindala emakethe, ezakhelwe ukuthutha izimpahla.

 Kuthiwa abathengi kabazithandisisi izimoto ezishibhile ngenxa yokuphephuka kwazo uma kunomoya, nokutabalasa kwazo emigwaqweni engemihle.

Abathengi bayazigwema lezi zimoto ngoba azikwazi ukumelana nemigwaqo engemihle, yisimo sezulu esingesihle, lapho lina kakhulu noma kunomoya nokuhluleka wukumelana nohambo olude.

Uma usuyidayisa emuva kwesikhathi imoto, kubalulekile ukwazi inani layo (resale value). Nakuba imoto ingafani nomuzi onyukelwa yinani ngokuhamba kwesikhathi, abantu abaningi bayakwazisa ukudayiseka kwemoto emuva kwesikhathi ukuze bangalahlekwela yikho konke, kanti lokhu sikuthola kakhulu kulolu hlobo lwezimoto ezintsha, ikakhulukazi kwezaseShayina.

  Uma usuyidayisa emuva kwesikhathi imoto, kubalulekile ukwazi inani layo (resale value)

Ngakho uma ungazimisele ukuyigcina isikhathi eside imoto, kubalulekile ukubheka inani layo lapho usufuna ukuyidedela.

Umdayisi wezimoto wegalaji elizimele esikhulume naye uthe, kukho konke umthengi okumele akucabange okusiza kakhulu lapho ubheka imoto, wukuthi uyisebenziselani.

Ingabe uyifunela umsebenzi, ibhizinisi, umndeni, noma izindlela zansukuzonke noma nje uma kunesidingo. Uphethe ngokuthi lokhu kukusiza kokuningi ngoba kunomthelela ekutheni iwudla kangakanani uphethiloli, ibiza kanjani kumshwalense, iphephe kangakanani nokuthi yimoto ongayigcina isikhathi esingakanani.