Kubalulekile ukuhlolelwa ushukela 

Baningi abanezinga eliphezulu likashukela kodwa abangazi...

Thandi Zondi 

KUNGABE ungomunye weningi labesifazane baseNingizimu Afrika abanezinga likashukela elingaphezulu kwelejwayelekile?

Kuthiwa iningi labesifazane linoshukela omningi egazini (pre-diabetic) kepha kalazi. Uma kuthiwa u-pre-diabetic kusuke kuchazwa ukuthi ushukela osegazini ungaphezu kowejwayelekile. Nakuba kunjalo, usuke ungakabi nesifo sikashukela okuwuhlobo olubizwa nge-type 2 diabetes, oluhaqa iningi.

Lolu hlobo (type 2), lubangelwa yindlela umuntu aphila ngayo nohlobo lokudla akudlayo. Phakathi kokudala lolu hlobo ukungazivocavoci, ukudla ngokweqile, ukudla okunoshukela nokudla okungenamsoco.

Isibalo sabesifazane abanoshukela omningi egazini kuthiwa siphezulu uma kuqhathaniswa nabesilisa, ngenxa yesibalo sabo esiphezulu sokukhuluphala ngokweqile.

Kanti noshintsho kuma-hormone oludalwa wukufika esigabeni sokukhula esaziwa
nge-menopause nokusebenzisa izivimbela nzalo ezithile, nakho kungaba nomthelela ekutheni umzimba uwusebenzisa kanjani ushukela.

Ngebhadi, kuthiwa iningi labantu kalazi ukuthi linoshukela omningi ngokweqile egazini, ngenxa yokuthi kazikho izimpawu eziba khona. Yingakho kubalulekile ukuthi uhlolelwe ushukela ukuze uthole kusenesikhathi.

  Ngubani okumele ahlolelwe ushukela:

💉 Okhuluphele ngokweqile ikakhulu uma amafutha emaningi okhalweni;
💉 Onomlando wesifo sikashukela emndenini (Type 2 Diabetes);
💉 Onomfutho wegazi ophezulu (high blood pressure), amafutha amaningi emzimbeni (cholesterol) noma isifo senhliziyo;
💉 Oke waba noshukela ngesikhathi esakhulelwe noma obelethe umntwana omkhulu ongaphezu kuka-4kg;
💉 Oyivila, ongawunyakazisi umzimba noma odla ngendlela engenampilo;
💉 Oneminyaka ewu-45 noma ngaphezulu.

      Zivikele kwi- type 2 diabetes:       

🏃🏾‍♀️ Nyakazisa umzimba nsuku zonke: Ngisho kungabe uhamba u-30 minutes kuzowenza umehluko
🥗 Yidla kahle: Yehlisa iziphuzo ezinoshukela nama-processed snacks, udle okunokolweni, ama-legume, amaveji, izithelo nenyama engenamafutha.
🏋🏾‍♀️Yehlisa isisindo: Yehlisa isisindo somzimba, kungehlisa ingcuphe yokuphathwa wushukela
🧪Hlolwa njalo ngonyaka: Ukuhlola kusenesikhathi kungakusiza ukuthi ungabi
 no-type 2 diabetes

Ukuba noshukela omningi egazini (pre-diabetes) kwejwayelekile futhi kuyelapheka ngokulandela izinyathelo ozinikwe ngabezempilo.

Ukuhlola kusenesikhathi kungahlenga impilo yakho.

*Ulwazi lucashunwe kwaBonitas.