NGUMNU Nqubeko Ndlela ongumsakazi weNongoma FM.

Ingxabano isuswe wukuphawula ngomshado wabobulili obubodwa, owagxekwa nguNgizwe Mchunu

Phumlani Gama

USENGCUPHENI yokukhalelwa ngamasongo kaS'gonyela uma kwenzeka ephula umthetho weNkantolo yaKwaNongoma, wokuba angaxhumani nomsakazi weNongoma FM, uthisha wesifazane waseMlokothwa High School, ekule ndawo.

UMnu Nqubeko Ndlela - ongumsakazi weNongoma FM - ufake incwadi yesivimbelo ngoba ethi isimume emphinjeni indaba yowesifazane ohlala ngoku-mthuka, aphinde ambize ngamaganyana angemahle.

UNqubeko ungelinye lamaciko azakhele igama ezingxenyeni ezahlukene ngenxa yekhono lakhe lokusakaza nokuphatha izinhlelo emicimbini. 

Kusatshalaliswe izithombe zomshado wabesilisa abathandana nabobulili obufana nobabo ezinkundleni zokuxhumana, behlobe ngemvunulo

Echaza ngesizathu sokunikela kwakhe enkantolo, uthe indaba isuswe yinkulumo eqale ukuqubuka emuva kokusabalala kwezithombe zomshado wabesilisa ababili, abathandana nabobulili obufana nobabo.

Lezi zithombe zisabalale emasontweni amathathu edlule. Udaba lwazo lukhulunywe kakhulu ezinkundleni zokuxhumana.

Abantu abaningi bebekhala ngokuthi kungani abathandanayo beqoke ukusebenzisa imvunulo yesizwe samaZulu namaXhosa, ekubeni ngokosiko kungavumelani nabakwenzayo.

Leli phephandaba linayo ingxenye yezinkulumo ezisongela lo msakazi, okusolakala ukuthi ziqoshwe yilo thisha ozwakala esho nokusho ukuthi lapho beyohlangana khona, kuyocisha ilanga.

"Isono sami wukuthi ngixwayise uNgizwe Mchunu (osesithombeni esingenhla) ngengozi engase imehlele uma eqhubeka nokwenza izinkulumo ezilumelayo ebantwini abathandana nabobulili obufana nobabo.

"Baningi abangigxeka ngombhalo wami, kodwa lona wesifazane kusukela lapho, kalikho elamahhala, uhlala ethi uzongithola angibeke isandla.

"Mina ngibone kuyisixazululo ukuthi ngivule icala, kodwa abomthetho bangeluleka ngokuthi mangifake incwadi yesivimbelo.

Kuthiwe uma kwenzeka ewephula umthetho, uzoboshwa," kusho uNqubeko.