UMasipala weTheku uthi uzolusukumela uhlelo lwe-EPWP

NGEZINYE zezisebenzi zikaMasipala weTheku ezisohlelweni
lwe-EPWP.

UMASIPALA weTheku uthi uzimisele ngokuqinisekisa ukuthi uhlelo lwe-Expanded Public Works Programme (EPWP), luhanjiswa ngendlela esemthethweni nesobala.

Kumanje lo masipala uthi sewuvule amacala amathathu obugebengu, okusaqhutshekwa nophenyo kuwo.

Umasipala uveza lokhu nje, kulandela isinqumo sokuhoxiswa koxhaso wuMnyango wezeseMisebenzi yoMphakathi, oholwa nguMnu Dean Macpherson.

Umbiko kamcwaningimabhuku (Auditor General of South Africa), uveze ukungahanjiswa ngendlela okuyiyo kwalolu hlelo kuMasipala weTheku, okubalwa kukho ukukhokhelwa kwezipoki, asebashona nabangakulungele ukuba kulolu hlelo. 

Kubikwa ukuthi umasipala wehlulekile wukwenza izinto ngendlela okuyiyo kusukela ngo-2021/22.

Lokhu kuvezwe nguMnu Macpherson esithangamini sabezindaba ngohlelo lwe-EPWP, kuMasipala weTheku.

Kokunye okubaliwe, wukuthi umasipala ubukhokhelwa ngaphandle kokwenza umsebenzi, uhlu lwabebesebenza, lokutshengisa ukuthi umsebenzi wenziwe, belungekho.

Umcwaningimabhuku uthole ukuthi kunezipoki ohlwini, asebashona nezisebenzi zikahulumeni. Bekukhona nezinombolo zomazisi ezingasebenzi.

Nakuba umcwaningimabhuku akuthola lokhu ngo-2021/22, futhi wawazisa umasipala, wafaka nezincomo ukuze kulungiswe isimo, kodwa umasipala ukushaye indiva konke lokho.

UMasipala weTheku wethembisa
ukuziphenya izinsolo zokuqashwa kwezipoki

UMasipala weTheku esitatimendeni osikhiphe  ngoLwesithathu, uthe uzophenya lapho uhlelo lungahanjiswanga khona ngendlela efanele, ubuyise okulahlekile, uqondise ubugwegwe, kuthathwe nezinyathelo zomthetho, bese uqinisa nendlela yokusebenza ngaphakathi.

Umasipala uthi uzoqhubeka nokusebenzisana nomcwaningimabhuku, futhi uthumele yonke imibiko ngozokwenza ukulungisa isimo.

Esitatimendeni, uthe sewuzoba nendlela yokulawula ukufakwa kwezicelo kwabafuna ukungena ohlelweni lwe-EPWP.

Kulokhu, kubalwa ukuthi umuntu aziyele ngqo ebhange uma kushintsha imininingwane yasebhange, ukusayinwa kwerejista lapho ufika emsebenzini, ukubalwa kwabantu okuzokwenziwa kukhona abaphathi nezisebenzi zikamasipala.

UMnyango wezeMisebenzi yoMphakathi uzoba yingxenye yalokhu, ukuqinisekisa ukuthi kabekho yini abaqashwe kwezinye izindawo.