'Ukungojwa' 
kweziphuzo emicimbini kumvulele
ibhizinisi

NguMnu Siyanda Msomi wakwa-K, KwaMashu (36) oyiMixologist, nongumnikazi weThe Oceans Mobile Bar.

Makhosi Dube

UKUPHOKOPHELA kufezekise iphupho losenebhizinisi elibukeke (iphupho) lishabalala esakhula. UMnu Siyanda Msomi wakwa-K, KwaMashu (36) oyiMixologist nongumnikazi weThe Oceans Mobile Bar, ungene emkhakheni abewuthanda wamabhizinisi ngendlela abengayilindele.

Le nsizwa ithi ikhule izimisele ukwenza izifundo eziphathelene namabhizinisi (Business Studies) ezikhungweni zemfundo ephakeme, okungenzekanga ngenxa yokungahlangani kwemali.

Ithi iphoqeleke ukuyotohoza, yagcina isebenza njengohlanzayo (cleaner) eGame City, esiyaziwa nge-City View. UMsomi uthi iso lakhe lithathekile wumsebenzi obuwenziwa e-Action Indoor Sports Arena ebiseGame City. Uthi le ndawo ibivulwa ntambama obekuqondana nesikhathi sakhe sokugoduka.

Uthi le ndawo ibidayisa izinto ezahlukene, okuhlanganisa neziphuzo.

Le nsizwa ithi isipiliyoni esithole kule ndawo, siyivulele amathuba kwezinye izindawo okubalwa neHoliday Inn Garden Court. Ithi ngenxa yokunqindeka ezindaweni ebisebenza kuzona ngoba ibinemibono yokuqhamuka nezinhlobonhlobo zeziphuzo, kanti lezi zindawo zilandela i-menu, igcine isishintshashintsha imisebenzi.

Lo somabhizinisi uthi ufikelwe umbono wokuqala ibhizinisi ngo-2015. Uthi: "Njalo uma ngisemicimbini emalokishini, bengiqaphela ukuthi iziphuzo ziyakhishwa kodwa uthole abantu "bebungoja" (fihla) utshwala. Lo mkhuba bewenza umnikazi womcimbi alahlekelwe, ngoba iziphuzo usuke ezikhiphile kodwa izihambeli zikhononde, zithi aziphuzanga lutho."

Ngomunye wemisebenzi weThe Oceans Mobile Bar.

Uthi wafikelwa lapho wumqondo wokusebenzisa isipiliyoni asithole kwiFood & Beverage Industry, wabona kungcono aqale ibhizinisi.

UMsomi uthi uqale ngocwaningo ngo-2016, 2017 wathola imisebenzi emibili. Uthi imali ayithola, wayisebenzisa ukwenza ama-cocktails
nama-mocktails, awamaketha ezinkundleni zokuxhumana.

Uthi yize izinto ziqale kancane kodwa amakhasimende abexoxela amanye, okwenze kwasebenzeka. Uthi nokusebenza nosomabhizinisi obekwi-decor kumdonsele amakhasimende.

Ngomunye wemisebenzi weThe Oceans Mobile Bar. 

Le nsizwa ithi ukufika koKhuvethe kudale izinkinga, yaphoqeleka ukuba idayise ingxenye yempahla yebhizinisi. Nokho ithi libuye lavuka njengoba manje isiqashe abantu abawu-3 ngokuphelele, abayisihlanu abanezinkontileka zesikhashana nabangaphezu kuka-20 ababizwa uma bedingeka.

Yingxenye yezisebenzi zeThe Oceans Mobile Bar. 

Enkampanini kaMsomi kukhona ama-mixologist, o-bartender, oweta, o-promoter nama-hostess.
Lo somabhizinisi uthi yize ibhizinisi lakhe lixhantile, kodwa zintantu izingxenye ezithandwa ngabantu.

Ubale I-Dry Bar: uthi lapho ikhasimende liyazithengela iziphuzo bona bafika nezinsiza (bar props and set up) abasuke bezozihlanganisa.
I-Cocktail Bar: Uthi lapho bafika nakho konke okuhlanganisa izinsiza, izithako zeziphuzo okuhlanganisa nokokuzihlobisa (garnishes), abazozihlanganisa (mixologists), benze ne-menu yeziphuzo esuke izohambisana nomcimbi. Uthi ama-cocktails menu abo ahambelana nezikhathi zonyaka njengasebusika lapho bengeza izinto ezifana nekhofi.

Okwesithathu, uthi i-Full bar: lapho befika nakho konke utshwala, iziphuzo ezingenabo utshwala, abazoweta, abazihlanganisayo konke kubasezandleni zabo.

NguMnu Msomi (ongakwesokunxele) nasebenza nabo eThe Oceans Mobile Bar. 

Le nsizwa ithi umzuzu engasoze yawukhohlwa wenzeke ngo-2022 lapho ibisiqala ukusebenza nezinkampani ezinkulu okubalwa amabhange, amahhotela namafestivali.

Ithi ivune izithelo ezinhle,  igama layo laba esigabeni sebalazwe ngesikhathi icelwa yikhasimende laseBrazil ukuba iyolimela kwiNdaba, eyayise-ICC.

Iveze ukuthi lapho kwakumele benze i-cocktail edume kakhulu eBrazil eyaziwa ngokuthi iCaipirinha, bencintisana nezifundazwe namazwe ahlukene ukuqhakambisa amasiko nosiko-mpilo lwalezo zindawo.

Lo somabhizinisi uthi bahambela zonke izifundazwe abasuke bethole kuzo umsebenzi.

UMsomi uthi ibhizinisi lakhe selikhiqize intsha, nayo esinamabhizinisi ayo.