Ukhuthaza intsha yaseNanda ukuba ifeze amaphupho ayo oyomela elakuleli phesheya

NGU-Anele Mtshali ekweminye yemidlalo yeshashalazi eke yakhonjiswa eThe Playhouse.

Skhosiphi Mthembu

UFISA indawo yangakubo ingabukwa njengedume ngokubi kuphela umfundi oyingxenye yekhwaya eyomela iNingizimu Afrika, phesheya.

U-Anele Mtshali (16) waseNanda owenza uGrade 11, e-Our Lady of Fatima Dominican Convent School , uthole ithuba eliyingqayizivele, lokuba yingxenye yeqembu lomculo elizoyomela elakuleli eCzech Republic, ePoland, naseGermany.

Lo mfundi ogcwele umfutho, uzalelwe wakhulela eNanda, uthi isifiso sakhe ukuba umphakathi ubone ukuthi kukhona okuhle endaweni yangakubo njengoba idume ngobugebengu.

Ngaphandle kokuba ngumculi, U-Anele ungumlingisi emidlalweni yeshashalazi, uke waba yingxenye yemidlalo ebibukiswa eThe Playhouse, eThekwini.

Phakathi kwemidlalo abe yingxenye yayo eThe Playhouse, kubalwa othi, Little Shop Of Horrors, iShrek The Musical, A Fairytale Christmas Carol, iThe Prince Of Egypt ukukha nje phezulu.

Uyingxenye yeKwaZulu-Natal Youth Choir nokuyiyo azoba yingxenye yayo njengoba ibhekise amabombo phesheya ekupheleni kukaNovember.

Uthi uqale ukufunda khona eNanda ngaphambi kokuba aye eNorth Crest Primary School okulapho ethole khona umfundaze ombeke lapha efunda khona manje okulapho aqale khona uthando lobuciko.

Uthi ujabule kakhulu ngokuthola leli thuba lokuya emazweni amathathu ayomela elakuleli neqembu ayingxenye yalo ngomhla ka-29 November kuya kumhla ka-10 December.