Kuzohlomula intsha ohlelweni lokuqinisa ezokuxhumana eKZN

KUZOHLOMULA kakhulu intsha ohlelweni lukahulumeni waKwaZulu-Natal ngokubambisana nabakwaVodacom neNgonyama Trust, lokufakwa kwemibhoshongo yokudonsa komakhalekukhwini (cellphone towers) ezindaweni ezisemakhaya.

Lokhu kuvezwe nguNdunankulu walesi sifundazwe uMnu Thami Ntuli, ngoLwesine, eThekwini ngesikhathi ememezela lesi sivumelwano sokusebenzisana
nabakwaVodacom, okuzohlomula kuso izakhamizi ezingaphansi kwezindawo ezisemaphandleni.

UNtuli uthi kulolu hlelo kulindeleke ukuba kube sekwakhiwe imibhoshongo engaphezu kuka-100 ezindaweni ezihlukene kulesi sifundazwe. Uthi iNgonyama Trust izodlala indima ebalulekile kulokhu, njengoba izindawo esezihlonziwe, okuzofakwa kuzo le mibhoshongo, zingaphansi kwamakhosi.

"KuMasipala wesiFunda uMgungundlovu kuzofakwa ewu-10, eMajuba ewu-10, eHarry Gwala kuzofakwa imibhoshongo ewu-14, Ogwini ewu-8, eKing Cetshwayo ewu-27, eMzinyathi ibewu-12, eZululand ibewu-7, eMkhanyakude ewu-3, oThukela ibewu-10 bese kwiLembe ibawu-7.

"Kodwa sivumelene nabakwaVodacom ukuthi uma ubudlelwano bethu buhambe kahle baqhubeke, nabo (abakwaVodacom) bazimisele ukusilekelela ngokufaka  engaphezu kuka-300," kusho uNtuli.

Eqhuba, uNtuli uthi ukufakwa kwale mibhoshongo kuzolekelela ekuqashweni kwentsha ngesikhathi kuqhubeka uhlelo lokufakwa kwayo, iphinde ihlomule nangokukwazi ukusebenzisa omakhalekhukhwini bayo ukufuna imisebenzi, nokuqhuba ezinye izinhlelo zezemfundo.

"Phezu kokulekeleleka kwentsha, imiphakathi yonkana izosizakala njengoba sekuzoba lula nokuthi ixhumane nezihlobo zayo noma nabosizo lokuqala uma kunezimo eziphuthumayo.

"Kuzokhumbuleka ukuthi ezinyangeni ezimbalwa ezedlule sethule i-App okuzobika kuyo izisulu zodlame lobulili. Sekuzoba lula nokuthi abantu abasemakhaya bakwazi ukuyisebenzisa ukuze bathole ukuvikeleka," kusho uNtuli.

Uthi kulindeleke ukuba sibe sesiphelile isigaba sokuqala ngasekupheleni kwenyanga ezayo, kanti yonke imibhoshongo kumele ibe seyisebenza ngaphambi kukokuphela kukaMashi wonyaka ozayo.

ngubo@ilanganews.co.za