Kuminyene utshumo kwizivimbamgwaqo ngamaholide

AMAPHOYISA abephansi-phezulu, epequlula izimoto ezedlula eMariannhill Toll Plaza, ngoLwesine. UNdunankulu waKwaZulu-Natal, uMnu. uThami Ntuli, neMeya yeTheku, uMnu Cyril Xaba, bebezibambele mathupha, belekelela ekuhlolweni kwezimoto ezingena eThekwini.
Izithombe ngu: Nhlanhla Gumede

Menzi Jele

"UMA sithi alufakwa lubuya nezephula-mthetho KwaZulu-Natal, sisuke singadlali. Sisuke sisho into enjengalena eniyibona lapha, eMariannhill Toll Plaza, namhlanje."

Ngamazwi kaNgqongqoshe wezokuThutha KwaZulu-Natal, uMnu Siboniso Duma, lawo. UMthombeni, ubekhuluma kwethulwa isivimbamgwaqo (road block) sokuqala, esikhulu ebesenziwe eMariannhill Toll Plaza, kusukela ngehora lesi-8 ekuseni ngoLwesine.

Bekuminyene utshumo, uphiko lukazwelonke, iNational Traffic Police, iSouth African Police Service (SAPS), yi-eThekwini Metro Police, uMnyango wezokuThutha esifundazweni, bevimba kwasani oludlulayo.

Ngaphadle kukaNgqongqoshe uDuma, bekukhona noNdunankulu wesifundazwe uMnu Thami Ntuli, iMeya yeTheku, uMnu Cyril Xaba.

UDuma, uthi esikhathini esingengakanani besiqalile isivimbamgwaqo, bathole izimoto zokwebiwa ebezibikiwe emaphoyiseni, nezibhamu ezingekho emthethweni.

"Nabantu abalayishe izibhamu ezingekho emthethweni, babanjiwe. Yisona sikhathi abantu abahlaselana ngaso lesi, samaholide. Bonke baboshwe ngamaphoyisa.

Izivimbamgwaqo zikhona ezingxenyeni ezahlukene zeKZN, njengoba kungamaholide ePhasika nje. Zizoba khona aze aphele amaholide," kusho uDuma.

 UNdunankulu waKwaZulu-Natal, uMnu Thami Ntuli, neMeya yeTheku, uMnu Cyril Xaba, bebezibambele mathupha, belekelela ekuhlolweni kwezimoto ezingena eThekwini.

UNtuli, unxuse abantu ukuba baziphathe kahle ngePhasika, akagcizelelanga emkhankasweni wezivimbamgwaqo.

"IPhasika yizinsuku lapho kuhlangana khona abantu bezinkonzo ezahlukene. Yizinsuku zokudumisa, ukuzindla, nokuhlangana kwemindeni. Sicela abantu bathathe leli thuba, bakhulekele isihlava sokubulawa kwabantu okuncikene nokobulili, nokuphela kobuntu kubantu.

"Sisembidlangweni wokubuyisa isithunzi sesifundazwe sethu, njengoba singabaholi ababambisene ekusiholeni ngobuqotho," kusho uNtuli.

Kuthiwa bezibalelwa ku-10 000 izimoto ebezedlula eMariannhill Toll Plaza ngehora, ngosuku lokuqala. Amaphoyisa abehlisa abagibeli amatekisini, abheke izimpahla abaziphethe ukuthi azinazo yini izidakamizwa, nezibhamu ezingekho emthethweni.

Ziningi izimoto ebezinikwa amathikithi ngoba zingekho esimeni sokuba semgwaqweni. Ntambama kuzoqale kuqiniswe ekubhekeni labo abashayela bedle amanzi amponjwana.
menzi.jele@ilanganews.co.za