UQhosha namaqhinga amasha okuvuka emculweni

Mthobisi Sithole 

UNAMAQHINGA okuzama inhlanhla yokungenisa kwezinye izifundazwe, umculi kamaskandi obesenyamalele endimeni yalo mculo, exakwe yizinkinga.

UQhoshangokwenzakwakhe "Qhosha" Sibisi waseShowe - okhiphe i-albhamu entsha muva nje ethi, "Door to Door" - uthi usemkhankasweni wokuyozikhangisa e-Eastern Cape naseWestern Cape.

Uthi uhlose ukuyofuna imakethe entsha yabantu, okubalwa ukuzikhangisa kubafundi ezikoleni zakulezi zifundazwe, nasemadolobheni akhona.

Utshele leli phephandaba ukuthi kuningi okuphazamise umculo wakhe phambilini, okubalwa ukuzibambela yonke into, okwenza wasilela emuva kokunye. Uthi njengamanje usenethimba elizosebenza ukukhangisa umculo wakhe ezindaweni ezahlukene.

Uthi njengamanje ukhiphe i-Extended Play (EP) enezingoma ezinhlanu. Ngonyaka ozayo ngoMashi uzokhipha i-albhamu egcwele njengoba ematasa e-studio, eyipheka. Uveze ukuthi nakuba nyakenye eyikhiphile i-albhamu, kodwa kayimusizanga.

"Kunabantu abangazi nokuthi bengikhiphile nyakenye ngenxa yezinkinga ezenzeke emculweni. Ngiyefana nje nongakhiphanga, yingakho lezi zingoma ezimbalwa ngizikhiphele ukuthi ngizibuyise kubantu, ngithole namasenti ngesikhathi sikaKhisimusi," esho.

Uthe ubuyelwe yithemba ngezingoma zakhe ezintsha ngendlela ezamukeleke kahle ngakhona emphakathini. Phakathi kwezingoma okubonakala zingenisa kwabaningi, kubalwa ethi, Fusegi' nethi 'Emizini yabantu'.

"Lezi zingoma zithandwa kakhulu yintsha. Kuyangijabulisa ngoba umculo usuphakanyiswa yintsha ezinkundleni zokuxhumana. Uma ngiqinisa kakhulu ekuzimaketheni ezikhungweni zemfundo ephakeme, ngizolekeleleka," esho.

Uthi umculo wakhe omusha usuyatholakala online.

mthobisis@ilanganews.co.za