Lizolekelela ekongeni imvelo ikhemisi lesintu

Yingxenye yabelaphi bendabuko namalungu omphakathi, abebehambele ukuvulwa kweKhemisi yesintu eHluhluwe iMfolozi Park.

Thandoluhle Ngubo

LIZOLEKELELA ekongiweni kwemvelo  nasekuqinisekiseni ukuthi amakhambi esintu kawapheli, ikhemisi lesintu elivulwe ngokusemthethweni wuhlaka olubhekelele ukongiwa kwemvelo KwaZulu-Natal, i-Ezemvelo KZN Wildlife, ngokubambisana nenhlangano yabelaphi bendabuko iTraditional Health Practitoners (THPs).

Leli khemisi elibizwa ngokuthi yiTraditional Healers Pharmacy, livulwe phakathi esiqiwini iHluhluwe-iMfolozi Park, ngenhloso yokulwa nezinkinga ezithinta ukusebenza kwamakhambi esintu, okubalwa kuzo ukumbiwa kwawo ngendlela engafanele, ukusetshenziswa kwezicubu zezilwane, ukulwa kokudayiswa kwamakhambi nezicubu okungekhona, nokunye okuningi.

NguMnu Sihle Mkhize oyisikhulu esiphezulu enhlanganweni
i-Ezemvelo KZN Wildlife.

Ekhuluma kulo mcimbi uMnu Sihle Mkhize, oyisikhulu esiphezulu se-Ezemvelo KZN Wildlife, uthe nakuba bebeboshwa abaphula imithetho ngokusebenzisa izitshalo namanye amakhambi ngendlela engekho emthethweni, kodwa beyingekho indlela yokulwa nale nkinga.

Uthi leli khemisi lizoba yisisombululo salokho. Uveze ukuthi ingxenye yaleli khemisi seyiqalile ukusebenza, futhi amakhambi nezinye izimfanelo ezifaka phakathi izinsalela zezilwane, kwaqala ukuqoqwa ngoMashi wonyaka owedlule, kwagcinwa endaweni efanele.

"Leli khemisi lizoqinisekisa ukuthi iyancipha imakethe yokudayisa amakhambi ngokungekho emthethweni. Sekuyisikhathi eside izimakethe ezihweba ngendlela engekho emthethweni zenza inzuzo ngemvelo yethu, abanye beboshwa, nemvelo yethu iya ngokushabalala.

Yingxenye yabelaphi bendabuko namalungu omphakathi abebehambele ukuvulwa kweKhemisi yesintu eHluhluwe iMfolozi Park.

"Abelaphi sebezokwazi ukuthola imvume ebagunyaza ukuba batholakale nakho konke okuthengiswa lapha, baqhubeke nokwenza usiko lwabo.

"Imvume izotholakala khona lapha ngo-R50. Bonke abelaphi bendabuko abagunyaziwe ukusebenza, banelungelo lokuzothenga lapha. Uma kuhamba kahle ohlangothini lwezomnotho, sizovula amanye amakhemisi afana nale ezifundeni uMgungundlovu, yiHarry Gwala neZululand esikhathini esiyizinyanga eziwu-18," kusho uMkhize.