Kuzohlonishwa uWilson B Nkosi kwezokusakaza

NGUWILSON B Nkosi ongumsakazi weMetro FM,ozohlonishwa kumaSouth African Voiceover Awards, eGoli.

Thandi Zondi

UMAKADEBONA kwezomsakazo uWilson B Nkosi, ongumsakazi wohlelo  iSounds and Stuff Like That kwiMetro FM, uzohlonishwa kumaSouth African Voiceover Awards (TSVA), eGoli.

Lo msakazi uzakhele udumo ngephimbo lakhe elimnandi, elinebhesi ehehayo, ikakhulukazi kwabesifazane, abanye abalibiza ngelasekamelweni. Izwi likaWilson B Nkosi lehlukile.

UMengameli weTSVA, uMnu Sinemivuyo Mpulu, uthe kabahloniphi kuphela umsebenzi kaNkosi, kepha bazohlonipha nomlando wakhe.

"Sijabule kakhulu ukuhlonipha ubab' uNkosi ngephimbo lakhe elihamba lifinyelele ezinhlizweni zabantu abayizinkulungwane. Lona wumzuzu wokubungaza, hhayi umsebenzi wakhe kuphela, kepha nomlando wakhe oqhubekayo nokugqugquzela," esho.

Le nkakha isiqede iminyaka ewu-30 isemsakazweni

Le nkakha esiqede iminyaka engaphezu kuka-30 emsakazweni nasezikhangisweni zomsakazo, yaziwa kakhulu nangesikhathi eside esisichithe kwiMetro FM.

Ibalwa nabanye babasakazi abachazwa njengokhi-limu kwiMetro FM, okubalwa kubo uTreasure Tshabalala, uLawrence Dube, uTim Modise, uShado Twala nabanye.

Uhlelo iSounds and Stuff Like That, lunabalaleli abaningi kanti selokhu alubamba kusukela ngo-2000, edlala umculo ogijima negazi, okwenza uzizwe usothandweni weRhythm and Soul.
La ma-awards azoba mhla ka-4 kuMfumfu (October) eGoli.

Ama-South African Voiceover Awards ahlose ukuhlonipha amaqhawe anganakekile, enza ama-voiceovers, okungamaphimbo abantu abasuke bekhuluma bengabonakali, kumabonakude, ezikhangisweni nakuma-digital platforms.

La ma-awards azobe enzeka okokuqala ngqa. Kulindelwe kugqame amagama aziwayo emkhakheni wezindaba, kwezikaqedisizungu nakwezokusakaza.